Мәскеу 8-9 мамырға жарияланған уақытша бітім бұзылған жағдайда Киевке жаппай соққы жасалуы мүмкін екенін ескертті. Осыған байланысты Ресей Сыртқы істер министрлігі шетелдік дипломатиялық өкілдіктер мен халықаралық ұйымдарға Киевтегі қызметкерлерін алдын ала эвакуациялау жөнінде ұсыныс жасаған, деп хабарлайды Ulysmedia.kz.
УАҚЫТША БІТІМ БҰЗЫЛА МА?
Ресей СІМ-інің ресми өкілі Мария Захарова мұндай мазмұндағы нота 4 мамыр күні Украинада аккредиттелген барлық елшіліктер мен халықаралық ұйымдарға жолданғанын мәлімдеді. Оның айтуынша, егер Украина тарапы «Жеңіс күніне арналған үнсіздік режимін» бұзса, Ресей әскері Киевке ауқымды соққы беруі мүмкін.
Захарова Ресейдің 8 және 9 мамырға біржақты тәртіппен уақытша бітім жариялағанын атап өтті. Сонымен қатар, ол Украина президенті Владимир Зеленский Мәскеудегі Жеңіс күні шараларын бұзуға ниетті деп айыптады.
«ҮНСІЗДІК РЕЖИМІ»
Бұған дейін Зеленский Ереванда өткен Еуропалық саяси қауымдастық саммиті барысында Мәскеудегі қысқартылған әскери парадты Ресей билігінің украин дрондарынан қауіптенуімен байланыстырған еді. Ресей Қорғаныс министрлігі бұл мәлімдемені 9 мамырда Мәскеуге дронмен шабуыл жасалуы мүмкін деген ескерту ретінде қабылдаған.
Мамыр айының басында Ресей президенті Владимир Путин 8-9 мамыр күндеріне орай уақытша бітім жариялау туралы шешім қабылдаған болатын. Ресей Қорғаныс министрлігі Украина мерекелік іс-шараларға кедергі келтіруге әрекеттенсе, Киевтің орталығына жаппай зымыран соққысы жасалуы мүмкін екенін мәлімдеді.
Өз кезегінде Зеленский Украина 6 мамырдан бастап атысты тоқтатуға дайын екенін айтқан. Ол адам өмірі кез келген мерекелік датадан маңызды екенін атап өтті. Украина президенті кеңсесінің басшысы Кирилл Буданов де Ресей шабуылдарын тоқтатса, Киев «үнсіздік режимін» сақтауға әзір екенін жеткізді.
6 мамыр күні Зеленский Ресейді жарияланған бітімді бұзды деп айыптап, Украина мұндай әрекеттерге «айна-қатесіз жауап қайтаратынын» мәлімдеді.
КОНТЕКСТ
9 мамырда Мәскеудің Қызыл алаңында Жеңіс күніне байланысты әскери парад өтеді. Бірақ бұл жолы оған әскери техникалар қатыспайды. Шараның өту уақыты да қысқарған. Кремль баспасөз хатшысы Дмитрий Песков бұны қауіпсіздік шараларымен байланыстырған.
Сәуірдің аяғында Ресей президенті Владимир Путин АҚШ басшысы Дональд Трамппен сөйлесіп, Жеңіс күні атысты уақытша тоқтата тұруды ұсынған. Украина президенті Владимир Зеленский «атысты уақытша тоқтату тактикалық алдауға айналмауы тиіс» деп мәлімдеген.
