Жетісу облысында азаматтардың дербес деректерін заңсыз пайдаланған коллекторлық агенттіктің қызметі тоқтатылды. Бұл базаға шамамен 16 миллион қазақстандықтың жеке мәліметтері енгізілген болуы мүмкін. Үш адам ұсталды, деп хабарлайды Ulysmedia.kz.
Толығырақ
Жетісу облысы полиция департаментінің хабарлауынша, облыстың Киберқылмысқа қарсы іс-қимыл басқармасының қызметкерлері облыстық прокуратура және ҰҚК департаменті қызметкерлерімен бірлесіп, Қазақстан азаматтарының дербес деректерін заңсыз пайдалануға байланысты коллекторлық агенттіктің заңсыз қызметін әшкерелеген.
“Жедел-іздестіру іс-шаралары барысында Талдықорған қаласында коллекторлық агенттіктің қызметкерлері азаматтардың дербес деректерін қамтитын мамандандырылған ақпараттық жүйені заңсыз пайдаланғаны анықталды. Аталған деректер базасы арқылы азаматтардың тегі, аты-жөні, ЖСН-і және ұялы телефон нөмірі бойынша ақпарат іздеуге мүмкіндік болған”, – делінген хабарламада.
Тергеу аясында деректер базасын ұйымдастыруға және пайдалануға қатысы бар үш адам ұсталды. Олардың тұрғылықты және жұмыс орындарында санкцияланған тінту жүргізілді.
Нәтижесінде дербес деректерді сақтау, өңдеу және тарату үшін пайдаланылуы мүмкін компьютерлік техника мен мобильді құрылғылардың едәуір көлемі тәркіленді. Сонымен қатар, тексеру шараларын жүргізу үшін бірнеше адам полиция органдарына жеткізілді.
Контекст
Айта кетейік, өткен жылы 16 маусымда Telegram-арна SexuriXy.kz қазақстандықтардың жеке деректері тағы да жаппай тарағаны туралы хабарлады. Архивтік файлда азаматтардың аты-жөні, жынысы, туған күні, ЖСН, байланыс нөмірлері (ұялы, жұмыс, үй), азаматтығы, ұлты және мекенжайы қамтылған.
