Қазақстанда Салық кодексі-нің 484-бабындағы ауыл шаруашылығы өнімін экспорттау кезінде қосылған құн салығын (ҚҚС) есепке алуға қатысты жаңа норма жойылатын болды. Бұл шешім Премьер-Министрдің орынбасары – Ұлттық экономика министрі Серік Жұманғарин төрағалығымен өткен жобалық кеңсе отырысында қабылданған, деп хабарлайды Ulysmedia.kz.
Толығырақ
Отырыста бұл норманы сақтап қалу отандық аграрияларға қосымша қолдау болатыны айтылды. Сонымен қатар, экспорт кезінде қосылған құн салығын (ҚҚС) толық көлемде қайтару мүмкіндігі қазақстандық ауыл шаруашылығы өнімдерінің сыртқы нарықтағы бәсекеге қабілеттілігін сақтап, арттыруға ықпал ететіні айтылды.
“Жобалық кеңсе отырысының қорытындысы бойынша ауыл шаруашылығы өнімдерін экспорттаушылар үшін есепке жатқызылатын ҚҚС сомасын түзету қолданылмайды деген шешім қабылданды. Яғни, Салық кодексінің 484-бабының осы нормасы жойылады. ҚҚС-ты қайтаруға қойылатын талаптардың негізділігі «пирамида әдісі» деп аталатын салықтық тексерумен расталады. Бұл тауар қозғалысының және салық төлеудің бүкіл тізбегін – ауыл шаруашылығы өндірушісінен экспорттаушыға дейін бақылауға мүмкіндік береді. Мұндай тексерудің оң нәтижелері болған жағдайда экспорттаушы бұрын төленген ҚҚС-ты толық көлемде қайтара алады”, – делінген хабарламада.
Бұл ұсыныс Салық кодексіне түзетулердің жалпы пакетіне енгізіліп, Құрылтайдың қарауына жіберілетін болады. Ол қабылданған жағдайда аталған өзгерістер жаңа Салық кодексі қолданысқа енгізілген күннен бастап ретроспективті түрде қолданылмақ.
Есепке алу ҚҚС түзету жөніндегі норманы енгізу кезінде бір мезгілде ауыл шаруашылығы тауарын өндірушілер үшін жеңілдік кеңейтілді: бюджетке төленуге жататын ҚҚС сомасын азайту мөлшері 70% - дан 80% - ға дейін ұлғайтылды. Экспорттық ҚҚС-ты қайтарудың бұрын қолданыста болған тетігін сақтау туралы шешім қабылданғандықтан, жеңілдіктің бұрынғы мөлшері - 70%-ды қалпына келтіру ұсынылады.
