Жамбыл облысында Жаңа жамбыл фосфор зауытының 26 жастағы қызметкері өндірісте ауыр жарақат алғаннан кейін екі айдан бері өтемақы ала алмай жүр. Цехта пеш жарылған кезде оған металл құбыр ұшып тиген. Салдарынан ер адам беті мен басынан ауыр жарақат алды, деп хабарлайды Ulysmedia.kz.
Мән-жай
Зардап шеккен Сұлтанбейбарыс Бескемпіровтің айтуынша, оқиғадан кейін бір құлағы нашар еститін болған. Бетінің бір бөлігі сезбей қалған, тыныс алуы қиындап, үнемі ауырсыну мазалайды. Бетінің жұмсақ тіндерінде әлі күнге дейін металл сынықтары бар.
Дәрігерлер оның жарақатын денсаулыққа келтірілген ауыр зиян деп таныған. Алда ер адамға жақ сүйегін қалпына келтіру оталары мен ұзақ ем қажет.
Зардап шеккен жігіттің заңгері отбасының ем-дом шығынын өз күшімен көтере алмайтынын айтты. Әсіресе шетелде кеңес алу немесе ота жасау қажет болса, шығын одан әрі көбейеді. Оның сөзінше, зауыт емдеу шығынын өтеп, зиян үшін өтемақы төлеуі керек. Талап етіліп отырған сома - шамамен 30 миллион теңге.
Зауыт кінәсін мойындады
Оқиға бойынша полиция еңбек қауіпсіздігі талаптарын бұзу дерегімен қылмыстық іс қозғады. Қазір соталды тергеу жүріп жатыр.
Облыстық еңбек инспекциясы арнайы комиссия тексерісті аяқтап, жұмыс берушінің толық кінәсін анықтағанын хабарлады.
Зауыт өкілдері оқиға үшін жауапкершіліктен бас тартпайтынын мәлімдеді. Олардың айтуынша, зардап шеккен қызметкерге материалдық көмек көрсетілген және алдағы емін төлеуге дайын.
Алайда кәсіпорын өкілдері қаражатты тікелей медициналық мекемелерге аударатынын, ол үшін операция мен басқа да медициналық қызметтердің құнын растайтын құжаттар қажет екенін айтты.
Жыл басынан бері жеті жұмысшы қаза тапқан
Еңбек инспекциясының мәліметінше, жыл басынан бері Жамбыл облысында өндірісте 24 жазатайым оқиға тіркелген. Соның салдарынан 7 адам қаза тауып, тағы 32 адам жарақат алған.
Осы уақыт ішінде мамандар 96 кәсіпорынды тексеріп, қауіпсіздік талаптарының 113 рет бұзылғанын анықтаған. Кінәлілерге 6 миллион теңгеден астам айыппұл салынды.
