«Атамекен» ұлттық кәсіпкерлер палатасының бұрынғы төрағасы, аса ірі көлемде алаяқтық жасағаны үшін сотталған Абылай Мырзахметов бостандыққа шықты, деп хабарлайды Ulysmedia.kz.
ТОЛЫҒЫРАҚ
Павлодар облыстық соты оның жазасының өтелмеген бөлігін неғұрлым жеңіл жаза түріне — пробациялық бақылауға ауыстырған.
Мырзахметовтің колонияда тәртібі жақсы болғаны, тіпті бірнеше рет көтермелеу алғаны хабарланды.
– Аталған сотталған азамат сот үкімі негізінде қылмыстық-атқару жүйесі мекемесінде жазасын өтеп жатқан. Кейін сот шешімімен жазаның өтелмеген бөлігі бас бостандығын шектеу түріндегі жазаға ауыстырылды, — деп хабарлады комитет өкілдері.
Мырзахметов жазасының өтелмеген бөлігін — бір жылдан сәл астам уақытты — тұрғылықты жері бойынша пробациялық бақылауда өткізеді. Оған пробация қызметінің келісімінсіз тұрғылықты жерін өзгертуге, облыстан тыс жерге шығуға рұқсат етілмейді. Сондай-ақ көңіл көтеру орындарына баруға тыйым салынған.
Мырзахметов жазасын Павлодар облысындағы №46 мекемеде өтеген. Ол жерде тігін өндірісін іске қосуға атсалысқан.
КОНТЕКСТ
Абылай Мырзахметовті 2024 жылдың мамырында сот аса ірі көлемде алаяқтық жасағаны үшін кінәлі деп танып, бес жылға бас бостандығынан айырған.
Тергеу нұсқасы бойынша, ол бір кәсіпкерден туысын қылмыстық жауапкершіліктен босатуға көмектесуге уәде беріп, ірі көлемде ақша алған. Алайда іс жүзінде ондай мүмкіндігі болмаған.
2024 жылдың шілдесінде сот үкімі заңды күшіне енді. Сот жаза мерзіміне 2023 жылдың мамырынан бастап қамауда болған уақытын «бір күн — бір жарым күн» тәртібімен есептеген. Осыған байланысты Мырзахметов бас бостандығынан айыру орындарында шамамен екі жыл тоғыз ай болған.
2025 жылдың қаңтарында қалған жазасын бас бостандығын шектеуге ауыстыру әрекеті сәтсіз аяқталған. Ол кезде сот сотталған адамның көтермелеу шаралары жеткіліксіз екенін көрсеткен. Кейін көтермелеу саны төртке жетіп, оның өтініші қанағаттандырылды.
