Қазақстанның Ішкі істер министрлігі 65 жастан асқан жүргізушілерге қатысты жаңа талаптардың қалай қолданылатынын түсіндірді. Ведомство медициналық тексеруден өтпегені үшін жаңа айыппұл енгізілмейтінін атап өтті, деп хабарлайды Ulysmedia.kz.
Мән-жайы
ІІМ-нің ресми өкілі Шыңғыс Әлекешев 65 жастан асқан жүргізушілердің міндетті медициналық тексеруден өтуі 2014 жылдан бері қолданыста екенін айтты.
25 тамыздан бастап тек бір өзгеріс күшіне енеді: жүргізуші медициналық тексеруден уақытында өтпесе, оның жүргізуші куәлігінің күші автомат түрде уақытша тоқтатылуы мүмкін.
Оның айтуынша, бұл жүргізуші құқығынан айыру деген сөз емес. Медициналық тексеруден өткеннен кейін куәлік қайтадан автомат түрде жарамды болады.
Медициналық тексеруден қашан өту керек?
ІІМ 65 жасқа толған бойда бірден тексерілу міндетті емес екенін түсіндірді. Алғашқы міндетті медициналық тексеруден 67 жасқа дейін өту қажет.
Одан кейін тексеру әр екі жыл сайын, яғни 69, 71 жаста және әрі қарай жалғасады. Осыған байланысты ведомство азаматтарды емханаларда кезек тудырмауға шақырды.
Тексеруден қайда өтуге болады?
Медициналық тексеруден мұндай қызмет көрсетуге рұқсаты бар кез келген мемлекеттік немесе жекеменшік емханада өтуге болады. Тіркелген мекенжайдың маңызы жоқ.
ІІМ медициналық тексеруден өтпегені үшін бөлек айыппұл қарастырылмағанын да атап өтті.
Сонымен қатар, жаңа талаптар күшіне енген алғашқы кезеңде полиция қызметкерлері тексеруден өтіп үлгермеген жүргізушілерге талаптарды түсіндіріп, ескерту жасайды.
Егер медициналық тексеруден өтіп қойғанымен, мәлімет электрон базаға әлі түспесе, полиция қызметкеріне қағаз түріндегі медициналық анықтаманы көрсету жеткілікті.
25 тамыздан бастап не өзгереді?
Еске салайық, 2026 жылғы 25 тамыздан бастап «Жол жүрісі туралы» заңға енгізілген өзгерістер күшіне енеді.
Жаңа талапқа сәйкес, 65 жастан асқан жүргізушілер әр екі жыл сайын міндетті медициналық тексеруден өтуі керек. Тексеруден өтпеген жағдайда, жүргізуші куәлігінің күші медициналық тексеруден өткенге дейін уақытша тоқтатылуы мүмкін.
