Маңғыстау облысында автобус адам өліміне әкелген жол апатына ұшырады. Көлік астына түсіп қалған «Маңғыстаумұнайгаз» компаниясының қызметкері оқиға орнында көз жұмды. Полиция тергеу бастады, деп хабарлайды Ulysmedia.kz.
Lada.kz басылымының жазуынша, жол апаты 6 қарашада Ақтау – Қаламқас тасжолының шамамен 170–171-шақырымында болған.
Алдын ала мәлімет бойынша, Daewoo маркалы автобус Қаражанбас кен орнына қарай бағыт алған. Жолда автобус жүргізушісі жолдан өтіп бара жатқан ер адамды қағып кеткен. Жаяу жүргінші алған жарақаттарынан көз жұмды.
«Маңғыстаумұнайгаз» АҚ қаза тапқан азаматтың өз қызметкері екенін растады.
«Марқұмның туған-туыстары мен жақындарына қайғыра көңіл айтамыз», – деп мәлімдеді компания өкілдері.
Компания оқиғаға қатысты өзге мәлімет жарияламады.
Маңғыстау облыстық полиция департаментінің хабарлауынша, жол апаты бойынша қылмыстық іс қозғалған. Автобус арнайы тұраққа қойылды.
Қазір тергеушілер жол апатының мән-жайын анықтап, оның неден болғанын тексеріп жатыр.
Полиция жүргізушілер мен жаяу жүргіншілерді жол қозғалысы ережелерін қатаң сақтауға шақырды.
