Қазақстанда алаяқтар тиімді инвестиция ұсынамыз деген желеумен жұрттың ақшасын алдап алып жүр. Ішкі істер министрлігі мұндай тәсілдер көбіне әлеуметтік желілер, мессенджерлер және түрлі интернет-платформалар арқылы тарайтынын ескертті, деп хабарлайды Ulysmedia.kz.
Мән-жайы
Ведомство мәліметінше, алаяқтар өздерін брокер, инвестициялық компания қызметкері немесе қаржы кеңесшісі ретінде таныстырады. Олар жоғары табыс, тез пайда және тәуекелдің өте аз болатынын айтып сендіруге тырысады.
Алдымен адамға аз ғана қаражат салуды ұсынады. Кейін жалған сайт немесе қосымша арқылы инвестициясы өсіп, шотындағы ақша көбейіп жатқандай көрсетеді.
Осыдан соң алаяқтар қосымша ақша аударуды талап ете бастайды. Мұны табысты арттыру, комиссия төлеу немесе шотты бұғаттан шығару үшін қажет деп түсіндіреді.
Ақшаны қайтарып алу мүмкін болмай қалады
Мәселе адам өз қаражатын шешіп алуға әрекет жасағанда басталады. Сайт ашылмай қалуы мүмкін, аккаунт бұғатталады, ал «кеңесші» із-түзсіз жоғалып, байланысқа шықпай қояды.
Сөйтіп, аударылған ақшаның бәрі алаяқтардың қолында қалады.
Алаяққа алданбау үшін не істеу керек?
ІІМ кепілді түрде жоғары табыс табасыз деген уәделерге және аз уақыт ішінде салған ақшаңызды бірнеше есе көбейтеміз деген ұсыныстарға сенбеуге кеңес береді.
Әсіресе әңгімелесуші асықтырып, ақшаны шұғыл аударуды сұраса немесе белгісіз қосымшаны орнатуды талап етсе, сақ болған жөн.
Сондай-ақ, банк картасының деректерін, CVV-кодты және SMS арқылы келген кодтарды бөтен адамдарға беруге болмайды.
Полиция күмәнді сілтемелерге өтпеуді және бейтаныс адамдардың нұсқауымен ақша аудармауды ұсынады.
