БҰҰ Бас Ассамблеясы Палестина президенті Махмуд Аббасқа әлем көшбасшыларының жыл сайынғы жиынында бейнебайланыс арқылы сөз сөйлеуге рұқсат берді. Мұндай шешім АҚШ оған Нью-Йоркке бару үшін тағы да виза бермегеннен кейін қабылданды, деп хабарлайды Ulysmedia.kz Reuters агенттігіне сілтеме жасап.
Тиісті қарарды 152 мемлекет қолдады. Үш ел қарсы дауыс беріп, тағы төрт мемлекет қалыс қалды.
Құжатқа сәйкес, Аббас пен Палестинаның басқа да жоғары лауазымды өкілдері алдағы бір жыл ішінде АҚШ-қа бара алмай қалған жағдайда БҰҰ отырыстары мен конференцияларына бейнебайланыс арқылы қатыса алады.
Осылайша, Махмуд Аббас екінші жыл қатарынан АҚШ-тың визалық шектеулеріне байланысты БҰҰ Бас Ассамблеясында қашықтан сөз сөйлемек.
АҚШ билігі Палестина өкілдеріне қатысты визалық шектеулердің ұзартылғанын мәлімдеді.
АҚШ Мемлекеттік департаменті бұл шешімді Вашингтон «Израиль-Палестина қақтығысын халықаралық деңгейге шығаруға бағытталған әрекеттер» деп бағалайтын қадамдармен байланыстырды. Олардың қатарында Палестина тарапының Израильге қатысты халықаралық соттарға жүгінуі де аталды.
Дауыс беру алдында АҚШ-тың БҰҰ жанындағы тұрақты өкілінің орынбасары Тэмми Брюс Палестина әкімшілігі АҚШ тарапы «терроризмді қаржылай қолдау» деп сипаттайтын әрекеттерді тоқтатып, басқару мәселесіне көбірек көңіл бөлуге тиіс екенін мәлімдеді.
Палестина тарапы Вашингтонның бұл ұстанымын қабылдамайтынын мәлімдеді. Палестинаның БҰҰ жанындағы тұрақты өкілі Рияд Мансур АҚШ шешімін айыптады.
1947 жылы жасалған БҰҰ штаб-пәтері туралы келісімге сәйкес, АҚШ жалпы алғанда шетелдік дипломаттардың Нью-Йорктегі БҰҰ штаб-пәтеріне баруына мүмкіндік беруге тиіс.
Алайда Вашингтон қауіпсіздік, экстремизмге қарсы күрес және сыртқы саясат мәселелерін негізге ала отырып, виза беруді шектеуге құқығы бар деген ұстанымды алға тартады.
