Шымкентте баспанаға мұқтаж азаматтарға арналған бағдарлама аясында тағы 50 пәтер бөлінді. Пәтер кілттерін тұрғындарға қала әкімі Ғабит Сыздықбеков табыстады, деп хабарлайды Ulysmedia.kz.
Көп қабатты үйлер Асар-2, Бозарық, Тұран шағынаудандары мен 189-орамда орналасқан. Пәтерлер сатып алу құқығымен жалға беру шарты негізінде ұсынылды. Яғни, қарапайым жалдау жүйесінен ерекшелігі – тұрғындар кейіннен баспананы өз меншігіне рәсімдей алады.
Жаңа пәтерлерге мүгедектігі бар азаматтар, көп балалы және толық емес отбасылар, ерекше балаларды тәрбиелеп отырған ата-аналар, жалғызбасты аналар, жетім және ата-анасының қамқорлығынсыз қалған балалар, сондай-ақ, мемлекеттік қызметшілер ие болды.
Аталған санаттағы азаматтарға мұндай қолдаудың маңызы ерекше. Бұл мемлекеттік бағдарлама талаптарына сәйкес баспана мәселесін шешуге мүмкіндік береді.
Баспаналар белгіленген талаптарға сәйкес бөлінеді. Осылайша кезекті пәтерлерді табыстау рәсімінде мемлекеттік қолдауға ие болған қала тұрғындарының саны артты.
Шымкентте тұрғын үймен қамту жұмыстары бірнеше бағытта жүргізіліп келеді. Баспана үлестірумен қатар, алдағы кезеңге арналған жоспар да бекітілген. Тұрғын үй кезегінде тұрған азаматтарды қамту үшін жалдамалы және несиелік баспана бағыттары бойынша жұмыс жалғасады. Жыл соңына дейінгі жоспарланған көрсеткіштер туралы қалалық тұрғын үй басқармасының өкілі мәлімдеді.
«Отбасы банк» акционерлік қоғамының мәліметіне сәйкес, Шымкент қаласында 98 693 азамат тұрғын үй кезегінде тіркелген. Қала әкімдігі 2026 жылдың соңына дейін кезекте тұрған азаматтарға 7 482 пәтер беру жоспарлап отырғанын жеткізді. Оның ішінде 3 736 пәтер жалдамалы, 3 746 пәтер несиелік бағытта болады.
