Қарағанды қаласы бойынша санитарлық-эпидемиологиялық бақылау департаменті «Қарағанды Су» ЖШС-на жоспардан тыс тексеру жүргізді, оның барысында ағынды сулардың өзенге ағу фактісі расталды, деп хабарлайды Ulysmedia.kz.
"Тексеру барысында ағынды сулардың Кіші Бұқпа өзеніне құйылу дерегі расталды. Бұл аумақтың сызбасын зерделеу кезінде "Қарағанды Су" ЖШС су құбыры мен кәріз желілерінің қиылысы белгіленбеген. Басқарма мамандары жақын маңдағы нысандарға аралауды ұйымдастырды. Нәтижесінде су құйылу аймағы тексеріліп, жұқпалы аурулардың алдын алу бойынша санитарлық-ағарту жұмыстары жүргізілді», - деп хабарлады департаменттің баспасөз қызметі.
Тексеру қорытындысы бойынша «Қарағанды Су» ЖШС-не қатысты әкімшілік құқық бұзушылық туралы хаттама толтырылды. Ұйымға 5,5 миллион теңге айыппұл салынды.
Сондай-ақ, «Қарағанды Су» басшылығына нақты шараларды белгілеп, оның орындалу мерзімін көрсете отырып, бұзушылықтарды жою туралы ұйғарым берілгені атап өтілді.
