Қоғам белсендісі, сыбайлас жемқорлыққа қарсы күрескер Дидар Смағұлов өртке 10 күн қалғанда сот сыбайлас жемқорлық ұйымдасқан қылмыстық топ құрды деген айыппен «Семей орманы» мекемесінің үш жетекшісіне үкім шығарғанын айтты, деп хабарлайды Ulysmedia.kz.
Оның айтуынша, сот үкімі 29 мамырда шыққан. Олардың әрқайсысы 10 жылға бас бостандығынан айырылған.
«Олар тұтас жемқорлық ұйымдасқан қылмыстық топ құрды, олар кәсіпкерлерден 700 000 теңгеден 13 000 000 000 теңгеге дейін алым жинады, оның ішінде мемлекеттік сатып алу туралы келісім-шарттарға қол қою да бар. Мұндай басқару кезінде қызметкерлерге қауіпсіздік үшін қажеттінің бәрі қамтамасыз етілмегені, мүмкін, сондықтан да осындай қайғылы жағдай орын алғаны анық. Міне, мемлекеттік сатып алу туралы актідегі бір жалған қол қоюдың қорқынышты салдарға әкелуі», - деді Смағұлов.
Ол жымқырылған ақша өртті ерте анықтаудың әртүрлі жүйелеріне кетуі мүмкін екенін жеткізген. Нәтижесі жемқор жүйенің салдары қандай ауыр болатынын көрсетіп отыр.
«Иә, былтырғы Аманқарағайдағы өрттен кейін орман шаруашылығындағы жұмысшыларды жеткіліксіз қамтамасыз ету туралы көп айтылды, бірақ жағдай өзгерген жоқ: қарапайым қызметкерлердің жалақысы әлі 90 мың теңге шамасында. Бұлар нағыз батырлар болса да алатыны мардымсыз. Олар төтенше оқиға кезінде бастарын өлімге тігеді. Олар бірінші мүмкіндікте қашып кетпейді, бірақ шайқасқа бірінші болып барады. Әрине, олар 90 000 теңге үшін ерлік жасаған жоқ, бәріміздің амандығымыз үшін жасады. Олардың ерліктері алдында бас иіп, бүкіл елмен бірге аза тұтамын», - деп жазады қоғам қайраткері.
Абай ауданындағы орман өрттері кезінде адамдардың қаза болуы фактісі бойынша Қазақстан Республикасы Қылмыстық кодексінің 292-бабының 3-бөлігі (екі және одан да көп адамның өліміне әкеп соққан өрт қауіпсіздігі талаптарын бұзу) бойынша қылмыстық іс қозғалды.
Бұған дейін Абай ауданындағы өрт кезінде із-түзсіз жоғалғандардың тізімін журналист Михаил Козачков жариялаған болатын. (Ulysmedia редакциясы тек бес адамның мәйіті анықталғанын білді, қайтыс болғандардың аты-жөнін дәл айту үшін геномдық сараптама қажет).
Маусымның 9-ы күні Абай ауданында 30 мың гектарға жуық аумақты қамтыған өрт шыққаны хабарланды. Алайда кешке қарай оның аумағы 60 мың гектарға дейін ұлғайып үлгерді. Сондай-ақ орман шаруашылығының 14 қызметкерімен байланыс үзілгені айтылды. Осыған байланысты Семей қаласында төтенше жағдай жарияланды.
9 маусым күні кешке Қазақстан президенті Қасым-Жомарт Тоқаев Төтенше жағдайлар министрі Юрий Ильинге Абай ауданындағы өрт болған жерге баруды тапсырды. Сондай-ақ қаза тапқан үш өрт сөндіруші туралы да белгілі болды. Оқиға орнында арнайы техника жетіспейді, өрттің таралу болжамы дұрыс жасалмағандықтан сөндіру тым кеш басталды.
10 маусымға қараған түні өрттің Қазақстандағы ең ірі Шүлбі су электр станциясына жақындағаны белгілі болды. Бұл аймақты электрмен жабдықтауға қауіп төндіреді, бірақ жергілікті билік өрттің электр станциясына жақындап қалғанын жоққа шығарады. Сонымен қатар, Семейдегі қала маңындағы үш ауылдың тұрғындары эвакуацияланды. Облыс орталығында эвакуацияланғандарды қабылдауға тоғыз пункт дайындалды.
9 маусым күні түн ортасына таман президенттің баспасөз қызметі Қасым-Жомарт Тоқаевтың Вьетнамға сапарын кейінге қалдырып, Абай ауданындағы өрт аймағына ұшпақ болғанын хабарлады. Сондай-ақ Президегт Абайдағы өртпен күресу үшін бар мүмкіндікті пайдалануды тапсырды. Төтенше жағдайлар министрлігі (ТЖМ) 10 маусымға қараған түні Абайдағы өртті сөндіруге Алматы мен тағы төрт облыстан қосымша күштер мен құралдар жіберілетінін хабарлады.
