МАЭК-тегі апат: маңғыстаулықтарға жарық берудегі шектеулер алынды

Мамандардың айтуынша, жұмыс барысында қазандықтың оң жақ тұзды бөлігіндегі зақымдалған 5 экрандық құбыр ауыстырылды. Бұған дейін сол жақ тұзды  бөлігінде 12 құбыр ауыстырылған болатын.

“Барлық монтаждау жұмыстары аяқталғаннан кейін кәсіпорын қызметкерлері дәнекерленген құбырлар  металдарын бақылаудан өткізіп, гидравликалық сынақтар жүргізілді. Қуат блогы 17 тамызда сағат 17:30-да енгізілген. МАЭК қызметкерлері апатты тез арада жою үшін тәулік бойы үздіксіз жұмыс жүргізді. Энергия блогын жөндеу жоспарланған мерзімнен бұрын аяқталды”, – делінген хабарламада.

Қазіргі уақытта Энергия блогының жұмысы сыналуда, халық пен өнеркәсіптік кәсіпорындардың көпшілігі үшін “тиімді" электр қуатын өшіру режимі алынып тасталды. МАЭК мамандары барлық уәкілетті мемлекеттік органдармен және коммуналдық қызметтермен тұрақты консультациялар жүргізеді.

Еске салайық, 12 тамызда МАЭК-те тағы да апат болды. Салдарынан үшінші энергоблок өшіп қалды. Маңғыстау облысындағы бірнеше ауылдың тұрғындары жарықсыз қалды. Кейінірек өңір тұрғындарына жарық шектеумен берілетіні хабарланды.

Одан бұрын,  3 шілдеде МАЭК-те №1 энергетикалық блоктың жұмысы апатты жағдайда тоқтап қалған болатын. Апат салдарынан "Атырау мұнай өңдеу зауытының" жұмысы да тоқтады. 

МАЭК қызметкерлері сәуір айында кәсіпорында жабдықтардың тозғанын, сондай-ақ жалақының төмендігіне байланысты кадрлар жетіспейтінін айтқан. Ulysmedia тілшісі энергетика министрі Алмасадам Сәтқалиевтен неге бұл ескертуді ешкім елемегенін сұрады.

Министр МАЭК-тегі жағдайдың күрделі екенін растады. Онда толық көлемде күрделі жөндеу жүргізілмеген, қаржыландыру жеткіліксіз болған.

Ал үкімет басшысы Әлихан Смайылов Атырау зауытындағы апат салдарынан елде жанармай тапшылығы туындамайтынына сендірді.

13 шілдеде Маңғыстау атом энергетикалық комбинатында (МАЭК) және Атырау мұнай өңдеу зауытында (АМӨЗ) тексерудің алдын ала қорытындысы жарияланды.

Дәл сол күні “ҚазМұнайгаз” басшысы мен Энергетика вице-министріне сөгіс жарияланды.