Жоспар орындалмауы мүмкін: Қазақстанда мұнай өндірісі төмендеді

«Жоспар бойынша жыл соңына дейін 90,5 млн тонна мұнай өндіру қарастырылған. Биылғы 8 айдың қорытындысына қарасақ, жоспарлы деңгейге жетпей жатырмыз. Алайда жыл соңына қарай белгіленген көрсеткішке жетуге тырысамыз», - деді ол.

Хасеновтің болжамынша, жыл қорытындысы бойынша шамамен 89 млн тонна мұнай өндірілуі мүмкін.

«Еліміздегі ірі жобалар бойынша тиісті техникалық жұмыстар атқарылып жатыр. Олар бұл іс-шараларды тез арада аяқтаса, онда мұнай өндіру көлемі артады. Жалпы, биыл 90,5 млн тонна өндіру керекпіз, бірақ бұл көрсеткіш сәл азаюы ықтимал», - деді вице-министр.

Бұдан бұрын Алмасадам Сәтқалиев МАЭК-тегі апат Қазақстанның мұнай өндірісін тұралатқанын мәлімдеген.

Еске салайық, 12 тамызда МАЭК-те кезекті апат болды. Салдарынан үшінші энергоблок өшіп қалды. Маңғыстау облысындағы бірнеше ауылдың тұрғындары жарықсыз қалды. 

Одан бұрын 3 шілдеде МАЭК-те №1 энергетикалық блоктың жұмысы апатты жағдайда тоқтап қалған болатын. Апат салдарынан "Атырау мұнай өңдеу зауытының" жұмысы да тоқтады. 

МАЭК қызметкерлері сәуір айында кәсіпорында жабдықтардың тозғанын, сондай-ақ жалақының төмендігіне байланысты кадрлар жетіспейтінін айтқан. Ulysmedia тілшісі энергетика министрі Алмасадам Сәтқалиевтен неге бұл ескертуді ешкім елемегенін сұрады.

Министр МАЭК-тегі жағдайдың күрделі екенін растады. Онда толық көлемде күрделі жөндеу жүргізілмеген, қаржыландыру жеткіліксіз болған.