Желіде Максим Галкиннің концерттерін қолдау туралы петицияға қол жиналып жатыр. Петиция авторлары Қазақстанның екі үлкен залында күтпеген жөндеу жұмыстары басталғанына ешкім сенбейтінін, бұл концертке тыйым салудың кезекті сылтауы екенін мәлімдеді, деп хабарлайды Ulysmedia.kz.
Петиция 1 қазанда жарияланды, оның авторы – қазақстандық белсенді Динара Егеубаева. Автор өз үндеуінде қазақстандықтар елімізде танымал және сүйікті әртіске қатысты биліктің озбырлығына жол бермеуі тиіс екенін атап өтті.
- Қазақстанның екі ірі залында күтпеген жөндеу жұмыстары – ешкім сенбейтін сылтау. Біз бәріміз нұсқаулар Кремльден келетінін жақсы түсінеміз және біздің билік оларға сөзсіз бағынады, – деді Егеубаева.
Оның айтуынша, концертті өткізуге рұқсат бермеудің басты себептерінің бірі – Ресейдің Украинаға басып кіруін айыптаған әртістің ұстанымы.
- Қазақстандықтардың көпшілігі Украинаның жеңіске жетуін, Ресейдің ойсырай жеңілуін тілейді. Мұны өз дауысымызбен тағы да дәлелдейік. Қазақстан – Ресей емес. Галкин келсін!", - деп атап өтті белсенді.
Еске салайық, бұдан бұрын ресейлік әртіс өзінің ұйымдастырушыларымен бірге бірнеше айдан бері концерттерін өткізуге рұқсат алуға тырысып жатқанын жеткізген.
«Кейбір ойдан шығарылған себептер, сахна сыртындағы тыйымдар. Билеттерді сату не тоқтайды, не тоқтамайды. Түсінемін, мен қандай да бір себептермен Қазақстан билігіне қауіп төндіретін сияқтымын, олар менің концерттерімді өткізуден сескенетін сияқты. Қазіргі уақытта менің концерттеріме тыйым салынған», - деп шағымданды Максим.
Танымал әзілкеш «Қазақстанды және оның халқын жақсы көретінін» және осы оқиғаға өкінетінін айтты.
Кейінірек Халықаралық концерттік агенттіктің басшысы Алексей Пучков Галкиннің Қазақстанға келетінін, елімізде екі концерт өткізетінін мәлімдеді.
Алайда бірер күн бұрын ресейлік әртістің концерттері өтеді деп жоспарланған Алматы мен Астананың концерт залдарында «сахналар мен коммуникациялардағы проблемалар» анықталғаны хабарланды. Алматыдағы сахна механиктерінің апатты жағдайын жарияласа, Астанада «коммуникацияларды жөндеу» туралы айтылды.
Айта кетсек, Максим Галкин Ресей Федерациясының басшылығын Украинаға басып кіргені үшін сынап, елден кетуге мәжбүр болған. Ресейде оған шетелдік агент мәртебесі берілді.
Бір жылдан астам уақыт бойы Галкин Израильде өнер көрсетіп, Ресей басшылығының кейбір шешімдерін келемеждеді.
Алла Пугачева күйеуінің артынан Израильге барған. Күзде ол балаларына оралды.
