Human Rights Watch халықаралық құқық қорғау ұйымы Қазақстанда тұрмыстық зорлық-зомбылықтың алдын алу үшін жеткілікті күш-жігер қабылданбағаны, ал депутаттарға әйелдерді жазалау туралы ойларын айтуға мүмкіндік берілгені үшін ел билігін сынға алды, деп хабарлайды Ulysmedia.kz.
Құқық қорғаушылардың айтуынша, депутаттың мұндай мәлімдемелері Қазақстанда жәбірленушілерді айыптау мәдениеті тамыр жайғанын, ал отбасылық зорлық-зомбылық туралы идеялар бұрмаланғанын көрсетеді.
Өз баяндамасында олар Қазақстанда тұрмыстық зорлық-зомбылық құрбандарын қорғау үшін шұғыл реформалар жүргізу қажеттігін айтқан.
Авторлар Қазақстан
билігін отбасылық-тұрмыстық зорлық-зомбылыққа қарсы іс-қимыл саласындағы заңнамаға түзетулер енгізуге, тұрмыстық зорлық-зомбылықты криминализациялауға және оны жеке құрамға бөлуге шақырады.
Айта кетейік, бұдан бұрын депутат Амантай Жарқынбек тұрмыстық жанжал туса, ерімен бірге әйелін де қамауға алу керегін мәлімдеген.
«Мынаны түсінуіміз керек: біздің еліміз, біздің жеріміз өте үлкен аумақты қамтиды. Бізде оңтүстік пен солтүстіктің, шығыс пен батыстың менталитеті бір-біріне ұқсай бермейді. Осы өңірлердің жастары бір-бірімен отбасы құрады. Әртүрлі тілде сөйлеп, әртүрлі ұстанымда болады. Олар отбасы болып қалыптасқанша, ұрыс-керіс те орын алады. Ыдыс-аяқ сылдырламай тұрмайды. Әр ыдыс-аяқ сынған сайын күйеуін апарып қамап тастайтын болсақ, көпшілігі қайтадан отбасы бола алмай, қосылмай кетеді», - деді ол.
