Үкіметте бүгін 2021 жылдың 11 айының, яғни қаңтар-қараша аралығындағы елдің әлеуметтік-экономикалық көрсеткіштері қорытындыланды. Ұлттық экономика министрі Әсет Ерғалиев ресми дерекке сүйене отырып, Қазақстан экономикасының өсу қарқыны 3,8%-ға дейін жеделдегенін айтады. Сондай-ақ министр өңірлердің осы бағыттағы көрсеткіштері жөнінде мәлімет жариялады. Қай әкім қай салада жұмысын жандандырып, қай салада артта қалғаны осы отырыста айтылды, деп хабарлайды Ulysmedia.kz.
ИНВЕСТИЦИЯСЫ АЗАЙҒАН ӨҢІРЛЕР
Ерғалиевтің айтуынша, 11 айда негізгі капиталға салынған инвестицияның өсу қарқыны 2,6%, оның ішінде тау-кен өндіру өнеркәсібін есепке алмағанда 11,7% құраған. Инвестициялар құрылыс саласында 2,1 есе, өңдеу өнеркәсібінде 50,5%, ауыл шаруашылығында 40,5%, саудада 34,2%, жылжымайтын мүлікпен операциялар саласында 18,6% және қаржы саласында 14,2% өскен. Өңірлер арасында ең жоғарғы көрсеткіш Шымкент, Алматы қалаларында, сондай-ақ Ақтөбе және Павлодар облыстарында байқалады.
Ал инвестиция тарту жағынан көрсеткіші өткен жылдың тиісті кезеңімен салыстырғанда төмендеген өңірлер үштігін Түркістан (-8,2%), Атырау (-12,9%) және Батыс Қазақстан облыстары (-17,9%) бастап тұр.
ӨҢІРЛЕРДЕГІ ӨҢДЕУ ӨНЕРКӘСІБІ
Өңдеу өнеркәсібінде тұрақты өсім үрдісі сақталыпты. Ресми деректерге сүйенсек, осы жылдың қаңтар-қараша айларында сала бойынша өндіріс көлемі 5,2% өскен. 15 өңір бойынша оң өсім көрсеткіші тіркелді. Ең жоғарғы өсім Алматы қаласында, сондай-ақ Алматы және Қызылорда облыстарында байқалады.
Бұл тұрғыда «минуста» тұрған өңірлердің қатарында Батыс Қазақстан (-3,9%) мен Түркістан (-5,0%) облыстары тұр.
ҚҰРЫЛЫС: ЕКІ ОБЛЫС ҮЛГЕРЕ АЛМАЙ ЖАТЫР
Ұлттық экономика министрі өткен 11 ай қорытындысы бойынша құрылыс саласы жоғары қарқынын сақтап, орындалған құрылыс жұмыстарының көлемі 6,2% өскенін айтады. Көрсеткіштің оң өсімі 15 өңірде тіркелген. Құрылыс-монтаждау жұмыстарының ең жоғары өсімі Алматы қаласы, сондай-ақ Маңғыстау және Ақмола облыстарында тіркелген.
Аталмыш бағытта көрсеткіші ең төмен облыстардың басында Гүлшара Әбдіхалықова басқаратын Қызылорда облысы (-4,1%) мен Жеңіс Қасымбек басқаратын Қарағанды облысы (-10,2%) тұр.
АРТТА ҚАЛҒАН – АЛМАТЫ ҒАНА
Қазақстанда жыл басынан бері 13,4 млн шаршы метр тұрғын үй қолданысқа берілген. Бұл ретте көрсеткіштің өсімі 10,6% құраған. Оң динамика 15 өңір бойынша тіркелген. Өңірлердің ішінде көрсеткіші «минусқа» кеткен бірден-бір қала – Алматы (-13,1%.)
АУЫЛ ШАРУАШЫЛЫҒЫ
Жыл басынан бері ауыл шаруашылығында өндіріс көлемі 2,5% төмендеген. Ең төмен көрсеткіштер Қостанай, Солтүстік Қазақстан және Ақмола облыстарында байқалып отыр. Саладағы өндірістің оң өсімі 11 өңірде тіркелді. Ең жоғарғы өсімді Павлодар және Шығыс Қазақстан облыстары көрсеткен.
10 ӘКІМНЕН ЖЕТЕУІ ОЗЫП ШЫҚТЫ
7 экономикалық көрсеткіш бойынша оң өсім 7 өңірде – Алматы, Шығыс Қазақстан, Жамбыл, Маңғыстау және Павлодар облыстарында, сондай-ақ Шымкент және Нұр-Сұлтан қалаларында тіркелген. 6 көрсеткіш бойынша өсім 9 өңірде байқалған. Олар Алматы қаласы, сондай-ақ Ақмола, Ақтөбе, Атырау, Қарағанды, Қостанай, Қызылорда, Солтүстік Қазақстан және Түркістан облыстары. Тек 5 көрсеткіш бойынша оң өсім Батыс Қазақстан облысында тіркеліп отыр.
