Сот отырысына төрт мәрте келмеген Алматы облысы полиция департаментінің экс-бастығы Серік Күдебаев сотқа мәжбүрлеп жеткізілетін болды, деп хабарлайды Ulysmedia.kz.
Алматы облыстық Полиция департаментінің бұрынғы басшысына 10 наурызда генерал-майор Күдебаевқа қатысты үкім шығарылуы керек еді. Алайда оның сырқатына байланысты сот отырысы төрт рет кейінше шегерілді.
Жетісу облысы сотының хабарлауынша, қылмыстық іс бойынша сот отырысы 3 сәуір сағат 10:00-де өтеді.
Сотталушы сот отырысына келмеді. Сотталушыда бұған дәлелді себеп жоқ. Соған байланысты қылмыстық-процестік кодекстің 157 және 335 бабына сәйкес, Серік Күдебаевты көрсетілген уақытта мәжбүрлеп әкелу туралы қаулы шығарылды, - делінген ақпаратта.
Еске салсақ, Серік Күдебаев 2020 жылдан 2022 жылдың қаңтарына дейін Алматы облысы полиция департаментінің бастығы қызметін атқарды. 58 жастағы полиция генарал-майоры қызмет бабын асыра пайдаланды деген күдікке ілінді. Тергеу мәліметінше, ол қаңтар оқиғасы кезінде жұмыс орнын тастап, кетіп қалған. Жаппай тәртіпсіздіктер кезінде полиция департаментінен қару-жарақтар ұрланған.
Күдебаевтың соты биылғы жылдың қаңтарында басталды.
28 ақпандағы сот отырысында мемлекеттік айыптаушы судьядан күдікті Серік Күдебаевты тоғыз жылға бас бостандығынан айыруды сұрады.
Айыпталушының ауруханаға түсіп қалуына байланысты сот отырысы алғаш рет 10 наурызда кейінге шегерілген болатын.
Үкім шығарылады деп жоспарланған 16 наурыздағы сот отырысы да өтпей қалды. Жетісу облыстық сотының ресми өкілі 27 наурыздағы отырыс та кейінге шегерілгенін мәлімдеген.
