Үкіметте мемлекет басшысының Астананы дамыту жөніндегі тапсырмаларының орындалу барысы талқыланды, деп жазады Ulysmedia.kz порталы үкіметтің баспасөз қызметіне сілтеме жасап.
Елорда әкімі Жеңіс Қасымбек отырыста жаңа бағдарламалық құжаттарды, Астананы дамытудың 2035 жылға дейінгі бас жоспары, 2030 жылға дейінгі қайта жаңарту бағдарламасын және көгалдандырудың бірыңғай тұжырымдамасын әзірлеу жұмыстары туралы баяндаған. Қала басшысы 3-ЖЭО-ның бірінші кезегінің және жалпы қуаты 1 130 Гкал болатын екі газ жылу станциясының құрылысы туралы айтып берді. Бұл тұрғын үй құрылысының қазіргі қарқыны сақталса, 2026 жылға дейін жылу энергиясы қорын жинауға мүмкіндік береді.
Сумен жабдықтау бойынша ұзындығы 44 шақырым су құбырының екінші желісін салу жұмыстары жүріп жатыр. Жоспарлардың орындалуы 2035 жылға дейін қажетті қорды қамтамасыз етеді.
«Бүгінгі таңда қалада су тапшылығы жоқ», - деп хабарлайды үкіметтен.
Биыл автожолдарды салу және жөндеу, сондай-ақ Тәуелсіздік көпірін аяқтау бойынша 30 жоба іске асырылып жатыр. Премьер-министр елорданы дамыту мәселелерін шешу Үкімет жұмысының маңызды бағыттарының бірі екенін атап өтті.
«Мемлекет басшысы атап көрсеткен барлық мәселе бойынша қажетті шараларды іске асыруды жалғастыру керек. Атап айтқанда, елорда әкімдігі бөлінген қаржыландыруды пайдалана отырып, барлық инфрақұрылымдық жобада, оның ішінде үлескерлері бар проблемалық құрылыс нысандарында құрылыс-монтаждау жұмыстарының уақытылы аяқталуын қамтамасыз етуі тиіс», — деді Әлихан Смайылов.
Премьер-министр республикалық бюджетті қалыптастыру және нақтылау кезінде Астананың басым жобаларын қаржыландыруды қарастыруды, сондай-ақ жыл соңына дейін елорда агломерациясын дамытудың кешенді жоспарын әзірлеп, оны үкіметке енгізуді тапсырды.
