Павлодардағы төтенше жағдай: қаза тапқандардың есімдері белгілі болды

Павлодар облысының әкімі Асайын Байханов кеніште болған төтенше жағдай туралы айтып берді.

Апат кезінде автобуста 4 адам болған. Олар – кәсіби әскерилендірілген авариялық-құтқару қызметтерінің республикалық орталық штабының Павлодар филиалының қызметкерлері.

Құтқару жұмыстары түнде басталды және әлі де жалғасуда. Жұмыстар топырақтың құлау қаупімен күрделене түсуде. Сәйкесінше, барлық қажетті қауіпсіздік шараларын сақтай отырып жүргізілуде.

Қазіргі уақытта екі құтқарушының денесі табылды. Олар: Сарқыт Берліқан, 23.10.1999 жылы туған, Олег Леонидович Тышкевич, 18.09.1970 жылы туған. Тағы екі құтқарушыны іздеу жалғасуда.

“Басқа зардап шеккендер жоқ. Оқиғаның себептерін ҚР ТЖМ өнеркәсіптік қауіпсіздік комитетінің төрағалығымен арнайы құрылған комиссия анықтайды", - деді әкім.

Естеріңізге салсақ, 4 қаңтарда сағат 01-25 шамасында Баянауыл ауданында «Майқайыңзолото» АҚ аумағында, Майқайың кеніші шахтасының маңында төрт жолаушысы бар автобус тазарту кеңістігіне құлап кетті.