Қазақстанда зейнет жасындағы сотталғандар, мүгедектер және кәмелетке толмай қылмыс жасағандар түрмеден мерзімінен бұрын шығарылуы мүмкін. Ел тәуелсіздігінің 30-жылдығына орай рақымшылық жарияланады, деп хабарлайды ulysmedia.kz.
Ал сол амнистияға тек қоғамға қауіп төндірмейтіндер ғана ілігеді, дейді КТК. «Рақымшылық туралы» заң әлі де парламент қарауында. Құжатта жеңіл және орта деңгейде қылмыс жасағандарды түрмеден босату көзделген. Ал ауыр және аса қауіпті қылмысқа барғандардың жазасы жеңілдетіледі. Ең алдымен рақымшылық кәмелетке толмағандарға, аяғы ауыр келіншектер, балалы әйелдер және ер адамдар, мүгедектер, егде жастағы сотталушыларға жасалады. Жаңа заң қабылданып, президент оған қол қойса, төрт мыңнан астам адам бостандыққа шығады. Жазасын өтеп жатқандардың арасында амнистияға ілікпейтіндер де бар.
«Рақымшылық ҚР ҚК 78-бабына сәйкес, жасөспірімдерді жыныстық зорлау, террористік және экстремистік қылмыс, қылмыстық топ пен ұйымдардың экс-мүшелеріне жасалмайды. Ал қылмыстық процестік кодекстің 476-бабының 15-тармағына сәйкес, амнистия жасауға қатысты соңғы шешімді сот жеке-жеке қабылдайды. Заң жобасына сәйкес, босатылғандарға әлеуметтік қолдау қарастырылған», - деді ҚР ІІМ қылмыстық атқару жүйесі комитетінің бөлім бастығы Жанар Шайдуллина.
