Төтенше жағдайлар министрлігінің басшысы Сырым Шәріпханов шахтаға түсіп, өрт болған және шахтерлер қаза тапқан орындарды аралап көрді, деп хабарлайды Ulysmedia.kz.
Іздестіру-құтқару жұмыстарына кәсіби әскерилендірілген авариялық-құтқару жұмыстары қызметі орталық штабының Қарағанды филиалынан барлығы 55 тау-кен құтқарушысы мен 15 техника жұмылдырылған.
«Жедел медициналық көмек көрсетуге 21 адам мен 7 жедел медициналық техника тартылды. Сағат 15:00-дегі жағдай бойынша қаза тапқан 42 адамның мәйіті табылды, 4 кеншіні іздеу жалғасуда», - деп хабарлады Төтенше жағдайлар министрлігі.
Бұған дейін Костенко шахтасындағы қайғылы оқиға салдарынан зардап шеккендердің саны 36 адамға жеткені белгілі болған.
28 қазан күні таңертең «АрселорМиттал Теміртау» кенішінде жарылыс болды. Шахтаға келген сәттен бастап оның құрамына жауапты тұлғалар мен әріптестер кірген жедел штаб құрылды.
Кейін Қазақстан президенті Тоқаев «АрселорМиттал Теміртаумен» ынтымақтастықты тоқтатуды бұйырды.
Қайғылы оқиға бойынша сотқа дейінгі тергеу басталды.
Сондай-ақ, үкіметтің «АрселорМиттал Теміртау» АҚ акционерлерімен алдын ала келісімге келгені және кәсіпорынды Қазақстанның пайдасына меншік құқығына беру жөніндегі мәміленің аяқталып жатқаны хабарланды.
Әлихан Смайылов Костенко шахтасындағы апаттың себептерін анықтау жөніндегі үкіметтік комиссияны басқарды.
Бір күн бұрын Тоқаев Қарағанды облысына өзі келіп, 29 қазанды жалпыұлттық аза тұту күні деп жариялады.
Сонымен қатар, президент «АрселорМиттал Теміртау» біздің тарихымыздағы ең нашар компания екенін атап өтті.
