41 отбасы 10 жылдық жалақы алды. Қарағанды облысының әкімі Ермағанбет Бөлекпаев брифингте Костенко атындағы шахтада қаза тапқан кеншілердің туыстарына қандай көмек көрсетілгенін айтты, деп хабарлайды Ulysmedia.kz.
«АрселорМиттал Теміртау компаниясы 41 отбасына 10 жылдық жалақы төледі. Қайтыс болған кеншілердің, олардың жұбайларының, ата-анасының, балаларының несиелері өтелді. Сондай-ақ компания әрбір отбасы мүшесіне кемінде 18 шаршы метр пайдалы алаңы бар пәтерлерді сатып алуға міндеттенеді. Сақтандыру төлемдері, 23 жасқа дейінгі балалардың оқу ақысы қараша айынан бастап төлене бастайды», - деді әкім.
Республикалық бюджеттен кәмелетке толмаған балалары мен жоғары оқу орындарында 23 жасқа дейінгі балалары бар 20 отбасына асыраушысынан айырылу жағдайы бойынша мемлекеттік әлеуметтік жәрдемақы тағайындалды.
Сондай-ақ, 46 отбасы Бірыңғай зейнетақы қорынан жерлеуге арналған бір реттік төлемге құжаттарын алды. Бүгінгі күні 42 отбасына төленді, қалғандарына төлем жалғасуда.
«Бұдан бөлек, қаза тапқан кеншілердің отбасыларына басқа да көмек көрсетіледі», - деп қосты әкім.
Айта кетейік, 28 қазанда Костенко атындағы шахтада жарылыс болды. Шахтаға иелік ететін «АрселорМиттал Теміртау» компаниясының мәліметінше, лавада газ метан жарылысы болған деген болжам бар. Апат кезінде 46 кенші қаза тауып, 24 кенші жарақат алды.
