Қарағанды облысының әкімі Ермағанбет Бөлекпаев журналистермен кездесуде қайғылы оқиғадан кейін Костенко шахтасының қашан ашылатынын айтты, деп хабарлайды Ulysmedia.kz.
Аймақ басшысының айтуынша, бүгінде «АрселорМиттал Теміртау» компаниясының төрт кеніші толықтай жұмыс істеп тұр. Өрттің салдарын жою «Қазақстан» кенішінде жалғасып жатыр. Ал Костенко атындағы шахтада апатқа қатысты тергеу жүргізілуде.
«Мамандардың айтуынша, Костенкодағы жұмысты толық қалпына келтіру үшін тағы 2-2,5 ай қажет. Шахталарды жабу туралы сөз жоқ. Бұл әлі анық емес», - деп сендірді Ермағанбет Бөлекпаев. – Сондай-ақ кеншілер мен металлургтердің жалақысында төмендейтін өзгерістер болмайды, қысқартулар да болмайды. Ұжымдық шартқа сәйкес барлық міндеттемелер орындалады».
Әкім марқұм кеншілердің отбасыларына көрсетілген материалдық көмекке де тоқталды.
28 қазан күні таңертең «АрселорМиттал Теміртау» кенішінде жарылыс болғаны белгілі. Осыдан кейін жедел штаб құрылып, Қазақстан президенті Тоқаев «АрселорМиттал Теміртау» компаниясымен ынтымақтастықты тоқтатуды тапсырды. Жарылыс салдарынан 46 кенші қаза болды.
