Forbes Қазақстан мәліметі бойынша, еліміздегі олигархтардың жаңартылған тізімінде тек бес әйел бар, деп хабарлайды Ulysmedia.kz.
Forbes мәліметі
Forbes Kazakhstan журналы Қазақстанның ең бай бизнесмендерінің жыл сайынғы рейтингін жариялады. Автордың айтуынша, биыл рейтинг бірден екі есе өскен. 12 жыл бойы дәстүрлі түрде ең дәулетті 50 бай-манаптың орнына, енді 75-і аталатын болды.
– Тізімді кеңейту қажеттігін зерттеу тобы мен серіктестерінің бірнеше айлық жұмысы растады: қазақстандық ірі бизнес соңғы екі жылда айтарлықтай қарқын алды, - делінген басылымда.
Рейтингке байлардың жалпы байлығы былтырғы жылмен салыстырғанда – 8,2 млрд долларға өсіп, 46,63 млрд долларға жетті. Орташа есеппен – былтырғы 769 млн доллармен салыстырғанда 622 млн долларға дейін төмендеді.
Әйелдер
Рейтингте бес әйел бар. Олар: Динара Құлыбаева, Дариға Назарбаева, Раушан Сағдиева, Айжан Есімова мен Гаухар Қаппарова.
Айжан Есімова
Рейтингте ол 44-ші тұр. Оның дәулетінің едәуір бөлігін 2021 жылы Kazphosphate Limited британдық компаниясы арқылы Ғалымжан Есеновпен (рейтингте 15-ші түрған) бірге акционер болған "Қазфосфат" ЖШС сатудан түскен үлесі құрайды.
Сондай-ақ, оның "Sport Center" ЖШС (krida фитнес-клубы) және Петропавл нан-тоқаш комбинатында үлесі бар.
Байлығы 207 миллион долларға бағаланады.
Айта кетейік, Айжан Есімова Forbes рейтингінің 15-ші қатарында тұрған кәсіпкер Ғалымжан Есеновтің әйелі. Оның байлығы 590 миллион долларға бағаланды. Кәсіпкер "First Heartland Securities" АҚ-тың 99,74% иеленеді. Ол арқылы "First Heartland Jusan Bank" АҚ-тың 79,63% бақылайды. Ал банктің тағы 20,11% оған тікелей тиесілі. Сондай-ақ, Jusan Bank арқылы " Қазақтелекомның 9,19% және Кселлдің 9,08% (тағы 14,87% - жеке) үлесін иеленеді.
Айжан Есімова экс-шенеунік Ахметжан Есімовтің қызы. Есімов 2017-2021 жылдары "Самұрық-Қазына" қорының басқарма басшысы болып еңбек еткен. Содан кейін Қазақстанның бұрынғы президентінің штаттан тыс көмекшісі болып тағайындалды.
