Қаңтар оқиғасы кезінде «Алматы әуежайын басып алуды ұйымдастырды» деген айыппен 4 жылға сотталған журналист Әйгерім Тілеужанның қан қысымы көтеріліп, оң жақ беті жансыздана бастаған, деп хабарлайды Ulysmedia.kz.
Не болды
Бұл туралы оның адвокаты Айнара Айдарханова facebook-парақшасында жазды.
Түрмедегі белсенді Әйгерім Тілеужанның қан қысымы жоғарылап, оң жақ беті жансыздана бастаған. Бірақ түрме әкімшілігі оның денсаулығына қатысты шағымдарына реакция білдірмей отыр, - деп жазды ол.
Колонияда да тыныштық бермейді
Еске салсақ, бұған дейін Әйгерім Тілеужанға не себепті колонияда да тыныштық берілмейтінін хабарлаған болатынбыз.
Аса ірі мөлшерде алаяқтық жасағаны үшін екі рет сотталған әйел Жауғашты кенті мекемесінің әкімшілігіне арызбен жүгінген. Ол Тілеужанова денесіне зақым келтіріп, саусағын сындырды деп мәлімдеген. Бұл факт бойынша мекеме фельдшері сотталғанды қарап, анықтама жазды. 2024 жылдың 5 наурызында Іле ауданында сараптамасыз қылмыстық іс қозғалды, - деген сонда адвокат Айнара Айдарханова.
Толығырақ
Естеріңізге сала кетейік, Қаңтар оқиғасы кезінде Әйгерім Тілеужан «Алматы әуежайын басып алу ісі» бойынша төрт жылға сотталған еді. Сот пен тергеудің мәліметінше, Тілеужан әуе кемелерінің қозғалысын, оның ішінде ҰҚШҰ әскерлерінің десантын бұғаттауға түрткі болған тәртіпсіздіктерді ұйымдастырған. Тлеужаннан басқа сотталушылар орындығында тағы төрт адам болды, олар да сотталып кетті.
Сот процесінде белсендінің қорғаушылары тергеу біржақты болды деп бірнеше рет мәлімдеме жасады. Сот сотталушылардың кінәсіздігінің көп дәлелін ескермеді, ал айыптауға оқиға туралы аз білетінін жасырмаған куәгерлердің айғақтары негіз болған. Тілеужанның қатысқанын бейнежазбаларда расталмады. Басқа сотталғандар Әйгерім Тілеужанованың атына тағылған айыптардың орнына тергеумен мәмілеге баруды ұсынғанын айтты.
Азаматтық белсенділер мен саяси қайраткерлер Тілеужан жағына шыққанын атап өткен жөн. Алайда сот тағылған айыпты дәлелденген деп шешім шығарды.
