Жоғарғы аудиторлық палата басшысы Әлихан Смайылов биылдан бастап "Самұрық-Қазына" ұлттық әл-ауқат қорының ірі компанияларына аудиторлық тексеріс жүргізілетінін хабарлады, деп жазады Ulysmedia.kz.
Смайылов не дейді
– Жоғарға аудиторлық палатаның функциялары ұлғайып жатыр. Былтыр мемлекет басшысы қосымша функция берді. Ол – жергілікті бюджеттердің аудитін жүргізу және активтерді басқару жөніндегі аудит жүргізу. Сонымен қатар, басқа аудиторлардың жүргізген аудиторлық іс-шараларын қайта қарап, қайта аудит жүргізу. Биыл квазмемлекеттік сектордың компанияларын егжей-тегжейлі жұмыстарын тексеру шараларын жүргізіп жатырмыз, – деді Әлихан Смайылов.
Жоғарғы аудиторлық палата күні кеше Мәжілісте көлік саласындағы аудиторлық тексерістің қорытындысы жарияланғанын айтты.
– Биыл тағы да Самұрық-Қазынаның ірі компанияларын тексеретін боламыз. ЭКСПО-да мемлекеттік компания ғой. Біз кезі келгенде оны да тексереміз, – деді ол.
ЭКСПО ғимараттары өзін-өзі ақтап жатыр ма? Бұл сұраққа Смайылов былай жауап берді.
– Қазір олардың табыстары ұлғайды. Бірақ өзін-өзі толық ақтап жатыр деп айта алмаймын.
ЭКСПО ғимараттарына кім жауапты
ЭКСПО ғимараттарына жауапты «QazExpoCongress» ұлттық компаниясы» акционерлік қоғамы ЭКСПО-2017 нысандарын көрме аяқталғаннан кейін пайдалану және қолдануды міндетіне алған.
