Қарағандыда көкжөтелден қайтыс болған баланың ата-анасы дәрігерлерді кінәлады. Олар бірнеше апта балаға қате диагноз қойылған деп отыр, деп хабарлайды Ulysmedia.kz.
«Ұзақ уақыт диагноз қоя алмады»
КТК телеарнасының хабарлауынша, 1 жас 10 айлық Богданның көкжөтелі кәдімгі суық тиюден басталыпты. Бірақ барған сайын жөтелі күшейе түскен. Жергілікті педиатр ұзақ уақыт диагноз қоя алмай, алдымен аллергия, содан кейін мұрнынан су ағу, кейінірек бронхит деген.
Олар көкжөтелге арналған ПТР тестін алды, мұны өзіміз талап еттік. Өйткені біз бұл көкжөтел деп ойладық. Бала антибиотиктермен емделді, үш дәрі тағайындалды. Осыдан соң ол әлсіреп, орнынан тұра алмай қалды. Миға қан құйылуын болдырмау үшін біз ЭЭГ жасауымыз керек, ауруханада ЭЭГ де, маман да, жабдық та жоқ. Ақылы емханадан құрал-жабдығы бар маман әкелдік, – деді анасы Оксана Нестерова.
Богдан небәрі 900 грамм салмақпен туғандықтан, алдымен екпеден босатылған. Бірақ олар баланы балабақшаға апаратын болғасын вакцина салуды жоспарлапты.
Ата-ана адвокат жалдап, құжаттар жинап жүр
Министр Әлназарова жағдайдан хабардар. Мен "Астанаға ауысайық, санитарлық авиацияны қолданайық, бәрін өзім төлеймін" деп сұрадым. Ал қазір жұрт ата-ана кінәлі деп жазып жатыр. Қарағанды облысы бойынша облыстық Денсаулық сақтау басқармасының басшысы ата-анасы кінәлі деп көрсетті, – деді марқұмның әкесі Сергей Нестеров.
Нестеровтар отбасындағы қайғылы оқиға ақпанда болған. Жергілікті әкімшілік ата-анасы бала инфекцияны жұқтырған соң 27 күннен кейін дәрігерлерге жүгінді деген. Сәби екпе алмағаны үшін осындай болды деп сендірді. Богданның анасы мен әкесі көкжөтелге қарсы вакцинация науқанындағы тәжірибесі сәтсіз шыққанына қапалы.
«Инфекция күрделі»
Өкінішке қарай, ауырған балалардың 80%-дан астамы екпе алмаған. Қарағанды облысында басқа да аурулармен ұзақ уақыт ауырып, шала туған бала наурызда көз жұмды. Баланы құтқару мүмкін болмады. Инфекция күрделі, сондықтан мен бүкіл халықты вакцина алуға шақырамын, – деді Денсаулық сақтау министрі Ақмарал Әлназарова.
Богданның ата-анасы адвокаттар жалдап, құжаттар жинап жатыр екен. Олар ауруханалардағы емнің неліктен оң нәтиже бермегенін анықтап, денсаулық сақтау қызметкерлерінің түсініктемелерін тыңдауға ниетті.
Еске салсақ, бұған дейін Қарағанды облысында көкжөтелден екі жасар бала көз жұмғанын жазған болатынбыз. Сондай-ақ наурыз айында елімізде 400-ге жуық бала осы аурумен ауырғаны белгілі болған еді.
