Астанадан шығып, Моңғолияға бара жатқан қазақстандық жолаушылары бар автобус Алтай Республикасындағы Шу трактісінде өртеніп кетті, деп хабарлайды Ulysmedia.kz.
Алтай Республикасы ТЖМ Telegram-арнасының мәліметіне сүйенсек, Шу трактісі автожолының 720-шақырымында рейстік автобустың өртенгені туралы хабарлама 20 шілде күні таңғы сағат 06:13-те түскен. Автобус Астана-Баян-Өлгей (Моңғолия) бағытымен келе жатқан.
Салонда 50 адам болды, оның ішінде 15 бала, барлығы эвакуацияланды. Қаза тапқандар мен зардап шеккендер жоқ.
"Сағат 06:14-те өрт орнына Оңғұдай ауылының №8 өрт сөндіру-құтқару бөлімінің өрт сөндірушілері саны 5 адам, 1 бірлік техника шықты. Сағат 07:15-те өрт сөндірілді. Автомобиль жолымен көлік қозғалысы шектелмеді. Ресей ТЖМ күшімен жолаушылар Иня ауылындағы уақытша орналастыру пунктіне жеткізілді", – делінген хабарламада.
