Оңтүстік Корея Солтүстік Кореяның Украинаға әскер жіберу жоспарын жариялады, деп хабарлайды Ulysmedia.kz DW агенттігіне сілтеме жасап.
УКРАИНАҒА ӘСКЕР ЖІБЕРУІ МҮМКІН
8 қазан, сейсенбі күні Оңтүстік Кореяның қорғаныс министрі Ким Ён Хён парламентте сөйлеген сөзінде Солтүстік Корея Ресейдің агрессивті соғысына қолдау көрсету үшін Украинаға тұрақты әскер жіберуі мүмкін екенін айтты.
“Пхеньян Ресейге көмектесу мақсатында өз әскерлерін Украинаға жіберуі мүмкін”,- деп мәлімдеді Оңтүстік Кореяның қорғаныс министрі Ким Ён Хён Ресей мен Солтүстік Корея арасындағы жан-жақты әріптестік туралы келісімге сілтеме жасап.
ПУТИННІҢ САПАРЫ СЕБЕП
Оның бұл мәлімдемесінің себебі — Владимир Путиннің маусым айында КХДР-ға жасаған сапары барысында Мәскеу мен Пхеньян қол қойған екі ел арасындағы ынтымақтастықты одан әрі тереңдету туралы келісім. Бұл келісімде тараптардың біріне шабуыл жасалған жағдайда әскери көмек көрсету туралы шарт бар.
"Ресей мен Солтүстік Корея әскери одаққа ұқсас өзара келісімге қол қойғандықтан, мұндай әскери қадамның ықтималдығы жоғары", — деп Оңтүстік Кореяның Yonhap агенттігі министрдің сөздерін келтірді.
4 қазанда Kyiv Post газеті украиналық барлауға сілтеме жасап, Украинаның қарулы күштері Донецк аймағындағы ресейлік әскери нысанға жасаған зымырандық шабуылынан 20-дан астам әскери қызметкер, оның ішінде алты КХДР офицері қаза тапқан болуы мүмкін екенін хабарлады. Шабуыл алдында Ресей Қорғаныс министрлігінің өкілдері солтүстік кореялық қонақтарға ресейлік әскердің шабуыл мен қорғаныс әрекеттеріне дайындығын көрсеткен.
РЕСЕЙ МЕН СОЛТҮСТІК КОРЕЯ АРАСЫНДАҒЫ ӘСКЕРИ ЫНТЫМАҚТАСТЫҚ
2023 жылдың 19 маусымында Ресей президенті Владимир Путин мен Солтүстік Корея басшысы Ким Чен Ын Пхеньянда екі ел арасындағы ынтымақтастықты одан әрі тереңдету туралы келісімге қол қойды. Путиннің айтуынша, келісімге сәйкес, БҰҰ-ның тиісті санкцияларына қарамастан, әскери-техникалық ынтымақтастық мүмкіндігі қарастырылған. Ресей президенті сондай-ақ АҚШ пен басқа НАТО елдерінің Украинаға ұзақ қашықтыққа дәл соққы жасайтын қару-жарақ жүйелерін, F-16 жойғыш ұшақтары мен басқа да осындай әскери техникаларды жеткізу туралы мәлімдемелеріне назар аударды.
Келісімге қол қойылғаннан кейін бір күн өткен соң Путин Ресейдің Украинадағы әскери қимылдарға Солтүстік Корея әскерін қатыстыруды жоспарламайтынын, мұндай қажеттіліктің жоқ екенін айтты деп хабарлады The Moscow Times газеті. Алайда, 27 маусымда КХДР-дың Ресей басып алған украиналық аумақтарға инженерлік әскерлер жібермек ниеті туралы ақпарат пайда болды. Оңтүстік Корея үкіметінің мәліметінше, Мәскеу бұл қызметтер үшін төлем жасауға міндеттелген. Пентагонда Солтүстік Корея әскерлері Украинаға жіберілетін болса, олар "зеңбірек қорегіне" айналады деп мәлімдеді.
