Астанада ауа райы күрт өзгеріп, қазір қалада қар ұшқындап тұр. Бұл әуежайдағы рейстерге де әсер етіп жатыр, деп хабарлайды Ulysmedia.kz.
Астана әуежайы баспасөз қызметінің мәліметіне қарағанда, қазір 8 рейс кейінге шегерілген. Оның үшеуі ұшып кететін, бесеуі ұшып келетін рейс.
Онлайн таблодағы мәлімет бойынша, Qazaq Air IQ 438 ұшағы Петропавлдан кешігіп жатыр, ол Астанаға 15:20-да қонуы керек еді, енді 15:45-те жетеді. Ақтөбеден ұшатын ұшақ бір сағаттан кейін келеді (17:55-те емес, 18:55-те). Бұл рейс Qazaq Air компаниясынікі.
Алматыдан DV 5351 рейсі (SCAT) үш сағатқа кешігеді.
Ұшып кететін үш рейс те: Новосібірге (IQ 511, Qazaq Air әуе компаниясы), Қытайдың Санья қаласына (DV 475, Scat әуе компаниясы), сондай-ақ Алматыға (IQ 359, Qazaq Air әуе компаниясы) ұшатын рейстер кейінге қалдырылған.
Баспасөз қызметі Астана халықаралық әуежайы төменгі температура кезінде үзіліссіз жұмыс істеуі үшін барлық қажетті шараны қабылдап жатқанын хабарлады.
