Америкалық Vast компаниясы люкс санатындағы қонақүйге ұқсас әлемдегі алғашқы жекеменшік ғарыш станциясының қалай жабдықталатынын таныстырды, деп хабарлайды Ulysmedia.kz The Sun басылымына сілтеме жасап.
Станцияда спорт залы, ортақ пайдалану аумағы, ойын-сауық бөлмелері болады.
Сонымен қатар ғарыш станциясында төрт жеке бөлме болады, олардың әрқайсысының зат сақтау орны, дәретхана орындығы және жеке ыңғайлылық жиынтығы бар.
“Алғашқы коммерциялық ғарыш станциясы Haven-1 келесі жылдың басында SpaceX Falcon зымыраны арқылы Жер орбитасына шығарылады деп жоспарланған. Ал алғашқы клиенттерді 2026 жылы бортқа шығару жоспарланып отыр”, деп жазды The Sun.
Жобаға бұған дейін SpaceX-те бес жыл бойы дизайн бөлімін басқарған және Starlink, Google және Apple компанияларында дизайнерлік лауазымдарды атқарған Vast компаниясының дизайн және маркетинг жөніндегі директоры Хиллари Коэ жетекшілік етіп келеді.
Саяхатшылар люкс станцияда 30 күнге дейін тұра алады. Мұнда тұру құны әзірге белгісіз.
