Қазақстанда аутизмге шалдыққандар саны соңғы бес жылда бес есе өскен. Ташкенттегі клиникаларға емделуге баратын бүлдіршіндердің 90% Қазақстаннан, деп хабарлайды Ulysmedia.kz Jibek Joly арнасына сілтеме жасап.
ҚАРАМА-ҚАЙШЫ КЕЙСТЕР
Баласына Қазақстаннан ем таппай, шекара асқандардың бірі – алматылық Әлия Тағаева. 8 жасар қызын Ташкентке жыл сайын апарады. Мектеп жасына келсе де тілі шықпаған жеткіншек тұрақты ем-домның арқасында сөйлей бастаған.
– Үш жылдың көлемінде уже сол Ташкенттен ем алып жүрміз. Ол жақта арзан консультациясы және емі де өзгеше. 10 күнде 10 дәрі аламыз. 250 мыңдай кетеді дәріге, бәріне, – днйді ол.
Ал Балнұр Шамұратова Ташкенттегі емнен кейін баламның ауруы керісінше, үдей түсті дейді. Туғалы ауыр дертпен күресіп келе жатқан бүлдіршін дәрінің көп мөлшерінен талма ауруына ұшыраған.
– Өкінішке қарай жақсы нәтижемен оралған жоқпыз ол жақтан. Күніне бес уколдан береді. Желкесінен екеу, жамбасынан үшеу салады. Сонда 10 күнде 50 укол аламыз. + менің балам айқайлап жылап стенаға басын ұрып солай әдет басталды, – деді Балнұр Шамұратова.
Дәрігерлер баланың қиналғанына қарамастан, емге бірнеше жыл қатарынан үзбей келуге кеңес берген. Балнұрдың айтуынша, Ташкендегі емханалар уатсап желісі арқылы топ құрып, жарнаманы сол жерде жасайды. Оң пікірлерді топтастырады. Онша емесін өшіріп тастайтын көрінеді.
– 3 ай сайын кел деді. Бала уколға тәуелді болып қалады. Ол уколды тоқтатсақ бала басқарымсыз болып кетеді. Былай қарасаңыз, 500 адам келе ме барлығына беретін дәрі бір. Хотя олардың диагнозы әртүрлі. Бизнеске айналдырып алған ғой, – деді ол.
ӨЗБЕК МАМАНЫ НЕ ДЕЙДІ
Арна тілшілері Ташкенттегі клиникалардаың біріне хабарласып көрген. Өзбек неврологы Захиджон Исмаилов өзі қабылдайтын науқастардың 90%-ы қазақ бүлдіршіндері екенін айтқан.
– Емге он күн сайын 160 баланы қабылдаймыз. Соның 90 пайызы – қазақстандықтар. Аутизмнен емдейтін басқа клиникаларда да шамамен солай. Мен өз басым әр балаға жауапкершілікпен қараймын. Дегенмен, жасыратыны жоқ, Ташкентте болсын, Қазақстанда болсын медицинадан тек бизнес көретіндер бар. Жалпы, аутизммен ауратын балаларды тек препаратпен емдеу дұрыс емес, – деді дәрігер.
ЖЕРГІЛІКТІ МАМАН ПІКІРІ
Аутизмге шалдыққан балалармен ұзақ жыл жұмыс істеген Айсұлу Қуат иньекциялық емге мүлдем қарсы. Айтуынша, мұндай ем-домнан кейін ауру одан әрі асқынып, эпилепсияға ұласады.
– Диагностика өткізгенде ең біріншіден сұрап аламын «Ташкентте болдыңыздар ма?» деп. Негізі баланың түрінен көрініп тұрады. Себебі сол Ташкенттегі иньекция баланы мүлдем тыныштандырып тастайды. Ол қуануын, ренжуін мүлдем көрсете алмай қалады, – дейді маман.
Соңғы 5 жылда елде аутизмге шалдыққан балалар саны бес есе өскен. Мемлекет аутист танылған балаға ай сайын 130 мың теңге көлемінде жәрдемақы төлейді. Бала тегін реабилтация орталықтарына жүгіне алады. Бірақ, елде мұндай орындар жетіспейді. Бас-аяғы 13 мекеме ғана жұмыс істеп тұр. Сыртқатты ерте анықтау да жолға қойылмаған.
ЕРЕКШЕ БАЛАЛАРДЫ ЕМДЕУ
ҚР ДСМ Ана мен бала денсаулығын сақтау департаментінің басқарма басшысы Майра Бейсен ерекше балаларға ем-дом көрсетуде кемшілік жоқ екенін айтады.
– Кемшіліктер бар деп айта алмаймын. Клиникалық сипаттамаға сай жүргізіледі. Бізде әр аурухананың жанынан диагноз қоятын орталықтар бар. 2019 жылы 5 мың болса, бүгінгі таңда 11 мың 300 бала тіркелген. Стационарлық, амбулатория жағдайында барлық емдер тегін көрсетіледі, – дейді Майра Бейсен.
Әзірге балаға көмек берудің жалғыз жолы – психокоррекциялық орталықтарға апару. Яғни логопед, дефектолог секілді мамандарға жүгініп, коммуникацияны дұрыстау, қоғамға бейімдеу. Ал шетелдік емханалар «аутизмнен толық емдеп шығарамыз» деп үміттендіреді. Баласына шипа іздеп, шарқ ұрған ата-ана осыған сеніп, барады. Барын салады…
