Астанада жер үйдегі өрттен көз жұмған төрт баланың өлімі бойынша қылмыстық іс қозғалды, деп хабарлайды Ulysmedia.kz.
Қалалық полция департаменті іс ҚР ҚК 292-бабы (өрт қауіпсіздігі талаптарын бұзу) бойынша жүргізілгенін хабарлады.
– Балалардың қазасына апарып соқтырған өрт қауіпсіздігі талаптарының бұзылуына байланысты ҚР ҚК 292-бабының 3-бөлігі бойынша қылмыстық іс қозғалды. Тергеу нәтижелері тексеру аяқталғаннан кейін жарияланады, – делінген хабарламада.
Қайғылы оқиға жайлы бүгін белгілі болған. Төтенше жағдайлар департаментінің хабарлауынша, Астанада екі қабатты жеке тұрғын үйде шатыр жартылай құлап, өрт болған. Құтқарушылар хабарлама келіп түскеннен кейін өрт орнына 6 минутта жеткен. Өрт алдын ала 500 шаршы метр алаңда оқшауланып, толығымен сөндірілген. Өрт салдарынан 2011, 2015, 2021 және 2022 жылы туған төрт бала қаза тапты.
