Бүгін, желтоқсанның 7-сі күні сағат 5:30-да «Балдәурен» оқу-сауықтыру орталығында жылу жүйесінде апатты жағдай болып, мектеп оқушыларының демалысын шұғыл түрде тоқтата тұруға тура келген, деп хабарлайды Ulysmedia.kz Pavlodarnews.kz-ке сілтеме жасап.
Оқыс жағдай бойынша Павлодар қалалық білім беру бөлімі түсініктеме берді.
– Жылу магистраліндегі апат жылу жүйесіндегі қысымның төмендеуіне әкелді. Бұл оқиға төтенше жағдайлар департаментінде тіркелді. Қазіргі уақытта лагерьде болған 86 баланың барлығы Павлодарға жеткізілді. Пайдаланылмаған демалыс күндері үшін қаражат ата-аналардың шотына қайтарылады, – деп жазды қалалық білім беру бөлімінің басшысы Қуаныш Қыдыралин.
Оның айтуынша, мамандар аумақты тексеріп, апатты ауыздықтау жұмыстарын атқарып жатыр.
Желтоқсан айында лагерьде жаңа маусым басталып, ата-аналар 86 баланы қала сыртына шығарып салған.
Еске сала кетсек, бала құқықтары жөніндегі уәкіл Сәуле Шәкенева Instagram желісіндегі парақшасында «Балдәурен» орталығындағы жағдай туралы жазба жариялаған болатын. Ол ата-аналардың сұрауы бойынша ол жерге жоспардан тыс барған. Үй-жайда шынымен салқын әрі тұрақты ұялы байланыс болмағаны анықталды, ал ғимараттардан бояу иісі шығып тұрған.
Еске сала кетсек, Ақтаудағы 39-шағын ауданның тұрғындары жолды жауып, әкіммен кездесуді талап етті. Олар пәтерлерінің суықтығына шағымданғысы келген.
