Каспийде 14 әскери қызметшінің өмірін қиған қайғылы оқиғадан бір тәулік өткен соң қорғаныс министрі Дәурен Қосанов мәлімдеме жасады. Ол ведомствоның «жауапкершіліктен жалтармайтынын» айтты. Осы уақытқа дейін қылмыстық іс бойынша бес әскери қолбасшылық өкілі ұсталған еді, деп хабарлайды Ulysmedia.kz.
«Ата-аналар бізге ұлдарын сеніп тапсырды»
Қосанов өз атынан, сондай-ақ Қорғаныс министрлігі мен Қазақстан Қарулы күштерінің барлық жеке құрамының атынан қаза тапқандардың туған-туыстары мен жақындарына көңіл айтты.
– Қоғамның бізге қойып отырған талаптары мен сұрақтарын да түсінемін. Біз жауапкершіліктен жалтармаймыз. Ата-аналардың бізге өз ұлдарын сеніп тапсырғанын, ал бүгін орны толмас қайғыға ұшырап отырғанының жеткізу маған да ауыр тиіп жатыр. Осы жағдайға байланысты кінәлі адамдар жауапқа тартылады. Біз қоғам алдындағы міндетімізді түсінеміз, – деді ол.
Қорғаныс министрі басшысының мәлімдемесі қайғылы оқиғадан кейінгі күні жасалды. Осы уақытқа дейін Қазақстан Қарулы күштерінің жоғары және аға командалық құрамының бес өкілі ұсталғаны белгілі болды. Олардың қатарында штаб бастығы, Әскери-теңіз күштері бас қолбасшысының бірінші орынбасары, екі әскери бөлімнің командирі, теңіз жаяу әскері ротасының командирі және катер командирі бар. Олардың барлығы іс бойынша күдікті ретінде өтіп жатыр.
Каспийдегі қайғылы оқиға
24 қыркүйекте Каспий теңізінде «Хазар Қорғаны – 2026» оқу-жаттығулары кезінде 17 әскери қызметшіні теңіз ағысы алып кеткен. Үшеуі аман қалды, 14 әскери қызметші қаза тапты.
