АҚШ Мемлекеттік департаменті Израиль мен Мысырға әскери қаржыландыруды қоспағанда, барлық шетелдік көмек бағдарламаларын тоқтату туралы бұйрық шығарды, деп хабарлайды Ulysmedia.kz.
МӘН-ЖАЙЫ
Бұл туралы дереккөздерге сілтеме жасап Reuters және AP агенттіктері хабарлады. Барлық қолданыстағы шетелдік көмек гранттары бойынша жұмыс 90 күнге тоқтатылды, делінген хабарламада. Бұл кезеңде де жаңа көмек көрсетілмейді.
Айта кетейік, бір күн бұрын АҚШ президенті Дональд Трамп бөлінген барлық сыртқы саяси көмекті 90 күн ішінде қайта қарауды талап ететін жарлық шығарған болатын. Reuters-дің хабарлауынша, бағдарламаларды жалғастыру, өзгерту немесе тоқтату туралы шешімдерді шолу нәтижелері бойынша Мемлекеттік хатшы Марко Рубио қабылдайды.
СӨЗБЕ-СӨЗ
«Біз жұмсаған әрбір доллар, біз қаржыландыратын әрбір бағдарлама үш сұраққа жауап беруі керек: бұл Американы қауіпсіз ете ме? Бұл Американы күштірек ете ме? Бұл Американы гүлдендіре ме? – деді Марко Рубио бұған дейін Сенаттың халықаралық қатынастар комитетінің мүшелеріне.
Politico басылымының хабарлауынша, АҚШ Мемлекеттік департаментінің бұйрығы Украинаға көмекті қаржыландыруға да қатысты болады. Ерекшеліктер тізіміне Израиль мен Египеттің әскери қаржыландыруы кіреді.
