Павлодар, Ақмола, Қостанай және Солтүстік Қазақстан облыстарында, сондай-ақ6 Шығыс Қазақстан облысындағы Риддер қаласында жылу беріле бастады. Бұл туралы Үкімет отырысында 'нергетика вице-министрі Қайырхан Тұтқышбаев мәлімдеді, деп хабарлайды Ulysmedia.kz.
Бірнеше өңірге жылу әлі берілген жоқ
Аптаның аяғына дейін бес өңірде жылу беру жоспарланып отыр. Олар – Астана, Қарағанды, Ақтөбе, Атырау және Абай облыстары.
Нақты мерзім ауа температурасына байланысты болады.
– Жалпы, жөндеу жұмыстары бекітілген кестеге сәйкес жүргізіліп жатыр. Энергия нысандарында жылыту маусымын бастауға қажет отын қоры мен жабдықтар дайындалды. 17 мың шақырым электр желісін жөндеу жұмыстары толық аяқталды, ал төрт қосалқы стансадағы жұмыс соңғы кезеңге жетті, – деді вице-министр.
Жылу желілерінің дайындығы 99 пайызға жеткен.
Коммуналдық қызметтер жоспарланған 377 шақырым желінің 374 шақырымын жөндеген. Яғни шамамен үш шақырым желіде жұмыс әлі аяқталмаған.
Барлығы бірдей дайын емес
Дегенмен Энергетика министрлігі бірнеше қаланы ерекше бақылауда ұстап отыр.
Петропавлда өткен аптада үш жылу магистралін жаңғырту жұмыстары аяқталды. Енді қала жылыту маусымы кезінде олардың тұрақты жұмысын қамтамасыз етуге тиіс. Степногорскіде әлеуметтік нысандарға жылу 25 қыркүйектен бастап беріле бастады. Жылу магистралін қайта жаңарту аяқталғанымен, мамандар қазір желілерді шаю және қысыммен тексеру жұмыстарын жалғастырып жатыр.
Тарату желілеріндегі жұмыстар аяқталған. Тұтынушылар жылуға кезең-кезеңімен қосылып жатыр. Ең алаңдатарлық жағдай Семейде қалыптасып отыр. Мұнда жылумен қамту жүйесін маусымға дайындау үшін үш жоба жүзеге асырылып жатыр.
Кейінгі бір аптада атқарылған жұмыс көлемі 12 пайыздық тармаққа өскен. Алайда жалпы дайындық деңгейі әзірге 82 пайыз ғана. Семейге арналған сорғы жабдықтары 27 қыркүйекте жеткізілді. Қазір мердігерлер оларды орнатып жатыр.
Энергетика министрлігі Абай облысының әкімдігіне жөндеу жұмыстарын барынша қысқа мерзімде аяқтауды тапсырды.
