Алматыда ауаның ластану деңгейі ДДҰ нормасынан 5 есе жоғары болып шықты

АЛМАТЫДАҒЫ АУА САПАСЫ ТУРАЛЫ ЕСЕП

Almaty Air Initiative қоры қаладағы ауа сапасына талдау жасады. Зерттеу жұмысында Алматыдағы ауаның ластануына қатысты негізгі деректер, бір жыл бұрынғы көрсеткішпен салыстыру жұмыстары жүргізілген. 

- Бұл шолу қала тұрғындарының экологиялық жағдайды және оның денсаулыққа әсерін тереңірек түсінуіне көмектеседі, делінген қор есебінде. 

ШКАЛА

AQI шкаласы бойынша 2024 жылы Алматыда: 

• 164 күн – таза (жасыл)
• 106 күн – орташа (сары)
• 50 күн – осал топтар үшін денсаулыққа зиян (сарғыш)
• қалған 46 күн – зиян (қызыл) болған. 

2023-ПЕН САЛЫСТЫРУ

2024 жылдың желтоқсанында Алматыдағы ауаның ластану деңгейі 2023 жылдың желтоқсанынан асып түскен. Былтыр PM2.5-тің орташа жылдың концентрациясы 24,08 мкг/м3  болған. Бұл Дүниежүзілік денсаулық сақтау ұйымының нормасынан бес есе жоғары. 

Айта кетейік, PM2.5 – адам денсаулығына зиян ауаны ластаушы заттардың өте ұсақ бөлшектері. ДДҰ дерегі бойынша, оның жылдық орташа концентрациясы 5 мкг/м3-тен аспауы керек. Қазақстан үшін шекті рұқсат етілген норма – 35 мкг/м3. 

ЕҢ ҚАУІПТІ КЕЗЕҢ

Алматы үшін ең қауіпті кезең – қараша мен ақпан аралығы екен. Зерттеушілердің сөзінше, бұл жылыту маусымының басталуы мен атмосфералық инверсияға байланысты. 

2024-ТЕГІ ЕҢ ЛАС КҮНДЕР

• 6 ақпанда орташа тәуліктік концентрация 114 мкг/м3 болған. Бұл нормадан 7,6 есе көп. 
• 25 желтоқсанда орташа тәуліктік концентрация 106,4 мкг/м3 болған. Бұл ДДҰ нормасынан 10,5 есе жоғары. 
• 26 желтоқсанда орташа тәуліктік концентрация 102,1 мкг/м3 болған. 

ЖАЗДА АУА ТАЗАРАҚ

Almaty Air Initiative қорының зерттеуіне сәйкес, қалада жазда ауа қысқа қарағанда бес есе таза. Мамыр айынан тамызға дейін, яғни жылы кезеңде көрсеткіш мейлінше жақсарған. Ең таза кезең – жаз мезгілі. 

ЕҢ ТАЗА АУА ТІРКЕЛГЕН САҒАТТАР

Зерттеу мәліметінше, Алматыда таза уақыт таңғы 04.00-06.00 аралығы, ал ең лас ауа кешкі 19.00-21.00 аралығы екен.