Елорда тұрғындары әлеуметтік желілерде пайда болған қызыл вагондардың суреттерін қызу талқылауда, деп хабарлайды Ulysmedia.kz.
Кейбіреулер бұл вагондардың трамвайға ұқсастығын байқаған. Олардың айтуынша, вагондардың дизайны ескірген әрі қазіргі заман талабына сай емес.
CTS компаниясы бұл мәселеге қатысты ресми түсініктеме берді. Компанияның мәліметінше, әлеуметтік желілерде тараған бейнематериалда көрсетілген көлік ЛРТ вагондары емес.
"Бұл - ЛРТ рельстерін салуға арналған маневрлік тартқыш көлік", - деп мәлімдеді баспасөз қызметі.
Яғни, қызыл вагондар Астанадағы ЛРТ жобасының бір бөлігі емес, тек құрылыс процесіне қажетті көліктер.
Қызыл вагондарды көрген кейбір тұрғындар таңданысын жасырмай, "ЛРТ неге осындай ескі вагондармен жабдықталды?" деген сұрақтар қойып жатыр. Дегенмен, ресми ақпарат таралғаннан кейін көпшіліктің көкейіндегі күмән сейілген.
БҰҒАН ДЕЙІН
Астана әкімі бұған дейін жеңіл рельсті көлік жүйесі 2025 жылдың қыркүйегінде сынақ режимінде жұмыс істей бастайтынын мәлімдеген болатын.
Ал City Transportation Systems компаниясының басқарма төрағасы Асылбек Дүйсебаевтің айтуынша, барлық құрылыс жұмыстарының толық аяқталып, LRT желісінің толыққанды іске қосылуы 2025 жылдың соңына жоспарланған.
