Қазақстан Ұлттық қорынан алынған қаражат көлемі түсімдерден асып түсіп, 1,45 трлн теңгені құрады, деп хабарлайды Ulysmedia.kz.
Қаржы министрлігінің сайтында 2025 жылғы 1 сәуірге арналған Ұлттық қордың есебі жарияланды.
Ондағы мәліметке сәйкес, қордың кірісі 631 млрд теңгені құрады. Оның ішінде 621 млрд теңге – мұнай секторындағы ұйымдардан тікелей салық түрінде түскен (жергілікті бюджетке түсетін түсімдерді қоспағанда).
Ал сол аралықта Ұлттық қордан алынған қаражат көлемі 1,45 трлн теңгеге жеткен. Бұл сома мыналарға жұмсалған:
Кепілдендірілген трансферттер;
Нысаналы трансферттер;
Қорды басқару және сыртқы аудит өткізу шығындары.
2024 жылдың осы кезеңімен салыстырғанда, биыл Ұлттық қорға түскен кіріс көлемі 46%-ға азайған. Алайда шығындар деңгейі өзгеріссіз қалған.
2025 жылдың алғашқы үш айында Ұлттық қор операциялары бойынша нетто-позициясы –819,8 млрд теңгені құрады. Соның салдарынан қор активтері жыл басындағы 33,1 трлн теңгеден – 1 сәуірге қарай 32,2 трлн теңгеге дейін қысқарды.
Аналитиктерді ең қатты алаңдатып отырғаны – мұнай өндіру көлемі артқанына қарамастан, мұнай секторынан Ұлттық қорға түсетін тікелей салықтардың күрт азаюы.
Бұл – еліміздің экономикасының ренталық табысқа тым тәуелді екенін ашық көрсетіп тұр. Ал мұнай бағасы жоғары болмай тұрған кезде, бюджет әлсіздігі одан сайын ушыға түседі, – деп жазылған Tengenomika Telegram-арнасында.
Былтыр жылдың соңында сарапшылар Қазақстанның экономикалық тұрақтылығын сақтау үшін Ұлттық қордан қаражат алуды тоқтату қажет деген пікір білдірген болатын.
