Абай облысы Бесқарағай ауданы Ерназар ауылдық округіне қарасты Коянбай ауылында құрғақ шөп өртеніп, өрт күшті желдің әсерінен «Семей орманы» табиғи резерватының Морозов филиалына қарай таралған, деп хабарлайды Ulysmedia.kz.
ӨРТ СӨНДІРУГЕ 240 АДАМ ЖҰМЫЛДЫРЫЛҒАН
Төтенше жағдайлар министрлігінің хабарлауынша, өртті сөндіру жұмыстарына Абай облысы мен Павлодар облысының төтенше жағдайлар департаменттері, «Семей орманы» және «Ертіс орманы» орман шаруашылықтары, сондай-ақ жергілікті атқарушы органдардың күші жұмылдырылған.
Барлығы 240 адам мен 96 техника іске қосылған. Сонымен қатар, әуеден визуалды бақылау жұмыстары жүргізіліп жатыр.
СЕМЕЙ ОРМАНЫНДАҒЫ ӨРТ
Еске салайық, 2023 жылы 8 маусымда “Семей орманы” резерваты аумағында өрт тұтанған еді. 9 маусым күні кешке қарай оның аумағы 60 мың гектарға дейін ұлғайып үлгерді. Өртпен арпалысып жүріп 14 адам қаза тапты. Қаралы қайғыға байланысты 12 маусым елімізде Аза тұту күні болып жарияланды.
Абай өңіріндегі ел тарихындағы ең ірі өртке байланысты төтенше жағдайлар министрлігінің басшысы Юрий Ильин қызметінен босатылып, оның орнына Сырым Шәріпханов тағайындалды (қазір ол да бұл қызметте жоқ). Антикор мәліметінше, төтенше жағдай министрлігінде жемқорлықтың 70%-ын бөлімше басшылары жасаған. Соңғы 5 жылда азаматтық қорғау органдарында 150-ге жуық сыбайлас жемқорлық фактілері тіркелген. Олардың басым бөлігі Алматы, Астана, Шымкент қалаларына, сондай-ақ Қостанай және Алматы облыстарына тиесілі.
Бородулиха аудандық соты резерват қызметкерлеріне өрт қауіпсіздігі талаптарын бұзғаны үшін (ҚК 292-бабы 3-бөлігі) екі адамды кінәлі деп танып, әрқайсысын жеті жылдан бас бостандығынан айырған болатын.
