Алматыда ұсталған Ресей азаматы Мансур Мовлаевтың адвокаттары қылмыстық-атқару жүйесі қызметкерлеріне қарсы қылмыстық іс қозғау туралы талап арыз дайындап жатқанын мәлімдеді, деп хабарлайды Ulysmedia.kz.
ПСИХОЛОГТЫ НЕ ҮШІН КІРГІЗБЕГЕН
Шешенстан белсендісі Мансур Мовлаев 2025 жылғы 13 мамырда Ресей күштік құрылымдарының сұранысы бойынша Алматыда ұсталып, кейін экстрадицияға дейін тергеу изоляторына қамалған. Алайда ол Шешенстанда билікті сынағаны үшін қудаланып жатқанын, бұған дейін азапталғанын айтып, сондықтан Қазақстанға келгенін мәлімдеді. Егер оны Шешенстанға қайтарса, өміріне қауіп төніп тұрғанын жеткізді. Мовлаевтың адвокаттары оған Қазақстанда бассауға іздеуші тұлға мәртебесін алып берді, бұл халықаралық құқыққа сәйкес оның экстрадициясын уақытша тоқтатуға мүмкіндік береді.
Комиссия отырысы жақын күндері өтуі тиіс. Онда оған саяси баспана беру мәселесі шешіледі. Бірақ Мовлаевтың адвокаттары Алматы изоляторының әкімшілігі арнайы психологиялық зерттеуді өткізуге мүмкіндік бермей жатқанын айтты. Бұл зерттеу шешім қабылдауда шешуші рөл ойнауы мүмкін. Мұндай әдіс бүкіл әлемде қолданылады. Арнайы дайындықтан өткен психолог тіпті оқиға екі жыл бұрын болса да, азаптау болған-болмағанын анықтай алады. Мовлаевтың жағдайында да солай.
– Біз әріптестерімізбен бірге Ыстамбұл хаттамасы аясында азаптауға қарсы зерттеу жүргізу үшін арнайы оқудан өткен психологқа адвокаттық сұрау жолдадық. Барлық рәсімдер сақталды, қажетті хаттар жазылды, келісім де алынды. Прокуратура тарапынан да рұқсат бар. Бірақ белгіленген уақытта психологпен бірге барғанымызда түсініксіз келісімдер басталды. Бізге мұндай біліктілігі жоқ өз психологтарын ұсынды. Психологиялық зерттеу болғанына қарамастан, медициналық сараптамаға рұқсат талап етілді, – деді адвокат Елена Жигаленок.
РЕСЕЙЛІК ПРОКУРОРЛАР ХАТ ЖІБЕРГЕН БЕ
Мовлаевтың адвокаттары тергеу изоляторы қызметкерлерінің әрекетін ресейлік прокуратураның қазақстандық әріптестеріне жолдаған хатымен байланыстырады. Бұл хат Мовлаевқа қатысты психологиялық зерттеу жүргізілуі тиіс күннің алдында ғана келген. Хатқа Ресейде оның үстінен қозғалған қылмыстық істің электронды көшірмесі тіркелген.
– Бұл істе Мовлаевқа қарсы нақты дәлел жоқ. Айыптаулар тек жалған жәбірленушілердің куәліктеріне ғана негізделген. Біздің прокуратура неге мұны елемей отырғанын түсінбеймін, – деді адвокат Рена Керимова.
Өз кезегінде Мовлаевтың үшінші қорғаушысы Мұрат Адам бұл сияқты хаттармен бұған дейін де кездескенін, алайда бұл жолғысының ерекше екенін атап өтті.
– Хатта Ресей прокуратурасы Мовлаевты саяси себептермен қудалау болмайтынына, оған азаптау мен қатігездік көрсетілмейтініне кепілдік беріп отырғаны жазылған. Бірақ мұндай кепілдіктер – бас прокуратура хаттары үшін тән емес жағдай. Негізі мұндай хаттарға арналған стандартты нысан бар, ал ол мұндай кепілдіктерді қамтымайды, – деді Мұрат Адам.
Сондай-ақ ол соңғы кездесуде Мовлаев өзіне бір ингуштың тергеу изоляторына әкелінгені туралы хабар жеткенін, оның адам өлтірді деген күдікпен ұсталғаны айтылып жатқанын жеткізді. Осыған байланысты Мовлаев тіпті изоляторда да өміріне қауіп төніп тұрғанын мәлімдеген.
Адвокаттар Мовлаевпен тегін жұмыс істеп жатқанын айтты. Олар психологты Алматыға өз қаражаттарымен шақыртып, тұру шығынын да өздері көтерген. Енді олар Алматы қалалық ҚАЖ департаментіне адвокаттық қызметке кедергі келтіргені үшін және келтірілген зиянды өтеу туралы сотқа арыз түсірмек. Адвокаттардың айтуынша, бұл - қылмыстық құқық бұзушылық санатына жатады.
