АҚШ-тық қаржы талдаушысы Джулиан Уэсттің пікірінше, теңге қазіргі таңда өз құнын жоғалтып отыр, деп хабарлайды Ulysmedia.kz.
ТОЛЫҒЫРАҚ
Джулиан Уэсттің айтуынша, доллардың нақты бағамы – 505 теңге болуы керек. Алайда теңгеге инфляция мен экономикалық құрылымдық тәуекелдер қысым жасап отыр.
Сарапшы Қазақстан экономикасы бірқатар күрделі мәселелермен бетпе-бет келгенін айтады. Олар: ЖІӨ-нің 60%-ына жеткен мемлекеттік қарыз, әлсіз өндірістік база, шикізат экспортына тәуелділік (мұнай, газ, металл), шикізат бағасының ауытқуына бейімдік және Ресейге тәуелділік. Ресей Қазақстанның маңызды сауда серіктесі бола отырып, рубльдің тұрақсыздығы мен санкциялық қысым арқылы әсер етіп отыр.
ДӘЙЕКСӨЗ
– Қазақстанның валюта нарығы – бұл Ұлттық банктің интервенциясы, инфляция және құрылымдық қауіптер қақтығысатын күрделі алаң. Инвесторлар үшін долларлық инвестициялар теңге девальвациясынан қорған бола алады, бірақ мұқият болуды талап етеді. Теңгенің нығаюы Ұлттық банктің инфляцияны тежеу, валюта тұрақтылығын сақтау және құрылымдық кемшіліктерді жою қабілетіне байланысты. Долларлық активтерді хеджирлеу құралдарымен және аймақтық талдаумен үйлестірген әртараптандырылған стратегия оңтайлы шешім болуы мүмкін. Теңге бағамы тұрақтылық пен әлсіздік арасында теңселіп тұрған тұста, Қазақстан нарығы батылдық пен сақтықты қатар қажет етеді, – делінген Уэсттің сараптамасында.
БОЛЖАМ
Сарапшы үш даму сценарийін атады. Пессимистік болжам бойынша, 2025 жылы доллар бағамы 561,9 теңгеге дейін өседі. Оптимистік нұсқада – 506,1 теңге, ал базалық сценарий – 533,4 теңге.
2025 жылғы 26 шілдеде Қазақстандағы айырбастау орындарында доллар 550 теңгеге жуықтады. Ұлттық банк төрағасы Тимур Сүлейменов шілдеде теңгенің күрт әлсіреуіне қатысты пікір білдіріп, қазіргі жағдай бақылауда деп мәлімдеді.
