Биыл Қазақстанда "МИ-171Ш" тікұшақтарын құрастыруды және автоматтар өндірісін жолға қою жоспарланып отыр, деп хабарлайды Ulysmedia.kz Индустрия және инфрақұрылымдық даму министрлігіне сілтеме жасап.
Ведомство мәліметіне сүйенсек, биыл сегіз жобаны жүзеге асыру жоспарланған. Атап айтқанда, Көкшетауда 2015 жылғы үлгідегі Калашников автоматтары өндірісін іске қосу көзделіп отыр. Ал Алматыда "Ми-171Ш" тікұшақтарын құрастыру қолға алынады.
Бұдан бөлек, Қазақстанда Airbus ұшақтарына қызмет көрсету жөніндегі сервистік орталық құрылуы мүмкін. СҚО-да мемлекеттік шекараны қорғайтын техникалық құралдар өндірісі жолға қойылады.
Министрлік дерегінше, төрт кәсіпорын базасында радиациялық және химиялық қорғау құралдары, автоматты оқ-дәрілер өндірісі іске қосылады. Сонымен қатар, "Барыс 8х8" бронетранспортерлік көліктері мен бронетанкілер өндірісі жаңғыртылады.
