Өскемен қаласында аяқ киім дүкенінің ашылуы кезінде орын алған бейберекет жағдайға байланысты кәсіпкер әкімшілік жауапкершілікке тартылды, деп хабарлайды Ulysmedia.kz.
Оқиға 2026 жылы 11 сәуірде болған. Әлеуметтік желілерде кеңінен жарнамаланған дүкен ашылуына тұрғындарды тегін палау тарату және аяқ киімді төмендетілген бағамен сату арқылы шақырған. Салдарынан акцияға жиналған адамдар саны шамадан тыс көбейіп, жағдай бақылаудан шығып кеткен.
- «Аталған іс-әрекет азаматтардың бақылаусыз әрі ұйымдастырылмаған жаппай жиналуына, қоғамдық тәртіптің бұзылуына әкеліп, адамдарға қауіп төндірді.Осы факті бойынша құқық қорғау органдары тексеру жүргізіп, жиналған материалдарды қарау нәтижесінде 2026 жылы 13 сәуірде іс-шара ұйымдастырушысы әкімшілік жауапкершілікке тартылып, оған айыппұл салынған», – деді қала әкімдігі.
Өскемен билігі бұл шараның жергілікті атқарушы органдармен келісілмей, заң талаптарын өрескел бұза отырып өткізілгенін мәлімдеді. Әкімдік өкілдері мұндай көпшілік жиналатын іс-шаралар барлық қауіпсіздік талаптары сақталып, міндетті түрде алдын ала келісіммен өтуі тиіс екенін атап өтті.
