Президент Қасым-Жомарт Тоқаев «Қазақстан Халық кеңесінің кейбір мәселелері туралы» жарлыққа қол қойды. Жаңа консультативтік-өкілдік орган елдегі маңызды қоғамдық және саяси мәселелерді талқылайтын алаңға айналады, деп хабарлайды Ulysmedia.kz.
МӘН-ЖАЙ
Алдын ала мәлімет бойынша, Қазақстан Халық кеңесінің құрамына 120-дан астам адам енеді. Олардың қатарында депутаттар, қоғам қайраткерлері және этномәдени бірлестіктердің өкілдері болады.
Президент бұған дейін бұл органның ел тарихындағы конституциялық деңгейде құрылған алғашқы диалог алаңы болатынын айтқан. Қазақстан Халық кеңесіне заң шығару бастамасы құқығы беріледі. Сонымен қатар ол ішкі саясатты қалыптастыруға қатысып, республикалық референдум өткізу туралы бастама көтере алады.
КОНТЕКСТ
1 шілдеде жалпыхалықтық референдумда қабылданған Қазақстанның жаңа Конституциясы ресми түрде күшіне енді. Осы күні Ulysmedia.kz алаңында «Халық Конституциясы: ел өміріндегі жаңа кезең» атты пікірталас өтті.
Жиынға қатысушылар Негізгі заңның қабылдануы реформалардың бастамасы ғана екенін атап өтті. Ендігі міндет – заңнаманы жаңа Конституция талаптарына сәйкестендіріп, онда көзделген жаңа институттарды іске қосу.
