Атырау әкімінің міндетін атқарушы Тілек Махуовтың басы дауға қалды. Желіде шенеунік 100 миллион теңге пара алды деген күдікпен ұсталғаны туралы ақпарат тарады, деп хабарлайды Ulysmedia.kz.
Мән-жай
Алдын ала мәлімет бойынша, бұл қаржы Атыраудағы кәріз желілерін күрделі жөндеу жобасын бір компанияның мүддесіне сай өзгертуге ықпал ету үшін берілген болуы мүмкін.
Желіде тараған ақпаратқа қарағанда, ақша делдал арқылы берілген. Делдал ретінде осы нысанда жұмыс істеген қосалқы мердігер аталып отыр.
Контекст
Бұл қала әкімдігіндегі алғашқы даулы іс емес. Бұған дейін Ұлттық қауіпсіздік комитеті Ulysmedia.kz редакциясына Атырау әкімінің орынбасары Мейіржан Мұқасовқа қатысты да соталды тергеу жүріп жатқанын растаған еді.
Ол кезде шенеунік жемқорлық ісі аясында жауап алуға жеткізілген. Алайда тергеу әрекеттерінен кейін босатылған.
Тергеуде аты аталған ықтимал тұлғалардың қатарында «Қалалық тұрғын үйлерге коммуналдық қызмет көрсету» ЖШС бас директорының орынбасары Бейбіт Мағзұмов та болған.
Тілек Махуов туралы не белгілі?
Тілек Махуов 2024 жылғы мамырдан бері Атырау әкімінің орынбасары қызметін атқарған. Оған дейін, 2023 жылдан бастап қалалық құрылыс бөлімін басқарған.
Еңбек жолында Махуов құрылыс саласында жұмыс істеп, мемлекеттік құрылымдарда түрлі қызмет атқарған. Соның ішінде Атырау облысының құрылыс басқармасында еңбек еткен. Сондай-ақ, жеке компанияларда басшылық лауазымдарда болған.
