«Қазгидромет» 2 тамызға арналған ауа райы болжамын жариялады. Синоптиктердің мәліметінше, еліміздің басым бөлігінде жаңбыр жауып, найзағай ойнайды. Ал оңтүстік өңірлерде жауын-шашынсыз аптап ыстық сақталады, деп хабарлайды Ulysmedia.kz.
Жаңбыр қай өңірлерде жауады?
Жексенбіде Қазақстанның көп бөлігінде жаңбыр жауып, найзағай күтіледі. Солтүстік және солтүстік-батыс аймақтарда кей жерлерде нөсер жаңбыр жауып, бұршақ түсуі мүмкін.
Ал елдің оңтүстігінде жауын-шашынсыз ауа райы сақталады. Республика бойынша жел күшейеді, ал оңтүстік өңірлердің кей жерлерінде шаңды дауыл тұруы ықтимал.
Ауа температурасы +42 градусқа дейін көтеріледі
Ең жоғары температура Қызылорда және Түркістан облыстарында тіркеледі. Мұнда күндіз ауа температурасы +40...+42 градусқа дейін ысиды.
Абай облысының оңтүстігінде +41 градусқа дейін ыстық болады.
Атырау, Алматы, Қарағанды, Павлодар, Шығыс Қазақстан облыстарында, сондай-ақ, Ұлытау, Жетісу және Абай облыстарында +35...+39 градусқа дейін аптап ыстық күтіледі.
Жамбыл және Маңғыстау облыстарында ауа температурасы +38...+40 градусқа дейін көтеріледі.
Өрт қаупі жоғары деңгейде сақталады
Батыс Қазақстан және Ұлытау облыстарында, сондай-ақ Ақтөбе, Жамбыл, Алматы, Маңғыстау, Қостанай, Солтүстік Қазақстан, Ақмола, Павлодар, Түркістан, Қарағанды және Абай облыстарының жекелеген аумақтарында жоғары өрт қаупі жарияланды.
Ал Атырау, Ақтөбе, Қызылорда, Жамбыл және Түркістан облыстарында төтенше өрт қаупі сақталады.
Сонымен қатар, Батыс Қазақстан, Маңғыстау, Қостанай, Ақмола, Қарағанды, Шығыс Қазақстан, Алматы облыстарының кейбір аудандарында, сондай-ақ Ұлытау, Абай және Жетісу облыстарында өрт қаупінің ең жоғары деңгейі сақталып отыр.
