Қазанның соңғы күндері мен қарашаның басында елдің бірқатар өңірінде ауа райы қолайсыз болады. Жаңбыр мен қар жауып, кей жерлерде жол көктайғаққа айналады. Екпіні күшті жел де қолайсыздық туғызады, деп хабарлайды Ulysmedia.kz.
Қай өңірлерде ауа райы бұзылады
31 қазан мен 2 қараша аралығында Қазақстанның басым бөлігінде жауын-шашын түседі. Бұған солтүстік-батыстан келетін циклон себеп болады.
Қазгидрометтің болжамынша, елдің солтүстігі мен шығысында көктайғақ болуы мүмкін. Бұл өңірлерде түнде және таңертең тұман түседі. Оңтүстік және оңтүстік-шығыстың таулы аймақтарында да айнала анық көрінбейді.
Оңтүстікте күндіз шаңды дауыл соғады. Елдің басқа бөліктерінде де екпіні күшті жел тұрады.
Қазақстанның батысы мен солтүстік-батысында ауа райы біршама тұрақты болады. Антициклонның әсерінен бұл өңірлерде жаңбыр мен қар жаумайды.
Ауа райы құбылғанымен, синоптиктер күннің күрт суып кететінін болжап отырған жоқ. Алдағы үш күнде ауа температурасы айтарлықтай өзгермейді.
